QazUÝ grant sany boıynsha kósh basynda
Ál-Farabı atyndaǵy Qazaq ulttyq ýnıversıteti bilim alýǵa berilgen grant sany boıynsha elimizdiń joǵary oqý oryndary arasynda sózsiz kósh bastady.
Qazaqstandyq joǵary bilim berýdiń búkil tarıhynda mundaı nátıjege eshqandaı oqý orny qol jetkizbegen. QazUÝ grant sany boıynsha ózge JOO-dan neǵurlym alda keledi. Mundaı nátıje talapkerlerdiń sanaly ári maqsatty tańdaýyn, QazUÝ-ǵa degen qoǵamdaǵy joǵary senimdi aıǵaqtaıdy. 
Búginde sapaly bilim jastar úshin mańyzdy ómirlik basymdyq bolyp tabylady. Osy jyly ýnıversıtetke túsýshiler tehnıkalyq jáne jaratylystaný-ǵylymı baǵyttaǵy mamandyqtarǵa basym tańdaý jasady. Sondyqtan eń úlken baıqaý radıotehnıka, elektronıka jáne telekommýnıkatsııalar, aqparattyq júıeler, avtomattandyrý jáne basqarý, standarttaý, sertıfıkattaý jáne metrologııa, bıotehnologııa syndy mamandyqtar boıynsha júrgizildi. Sonymen qatar aýdarma isi, halyqaralyq qatynastar, quqyqtaný, qarjy, esep jáne aýdıt, ekonomıka jáne halyqaralyq quqyq mamandyqtary talapkerler arasynda tanymal. Magıstratýra men doktorantýraǵa túsýge de baıqaý óte joǵary. Jekelegen mamandyqtar boıynsha úmitkerler sany bir orynǵa 20-dan asa adamnan keledi.
QazUÝ túlekterin maqtan tutady, olardyń izdenimpazdyǵy men tabystylyǵy - oqý ordasy qyzmetiniń basty kórsetkishi. Jumys berýshiler jumysqa qabyldarda QazUÝ dıplomy bar mamandarǵa basa mán beredi. Olar ekonomıkanyń san alýan salalary men el ómiriniń túrli aıasynda suranysqa ıe.
QazUÝ álemniń úzdik 250 JOO-nyń qatarynda jáne bilim, ǵylym men ınnovatsııanyń jetekshi ortalyǵy bolyp tabylady. Ýnıversıtet álemniń áıgili joǵary oqý oryndarymen qosdıplomdy bilim baǵdarlamalaryn, aǵylshyn tilinde oqytýdy jáne halyqaralyq yntymaqtastyqty qarqyndy damytýda, jumys berýshilerdiń talabyn eskere otyryp nátıjege baǵyttalǵan basqarýdyń aldyńǵy qatarly ádisterin, jańa oqý baǵdarlamalary men tehnologııalardy engizýde. QazUÝ-da birinshi kýrs stýdentterin qyzyqty ári mazmundy stýdenttik ómir kútýde, biregeı kampýsta tabysty oqý men shyǵarmashylyq múmkindikterin júzege asyrý úshin barlyq jaǵdaı jasalǵan.
