QazUÝ ǵalymdary ıdeal emes plazma fızıkasy boıynsha ótetin 15-shi Halyqaralyq konferentsııada óz zertteýlerin usynady

Al konferentsııa erteń, 31 tamyzda ál-Farabı atyndaǵy Qazaq ulttyq ýnıversıtetinde bolady, dep habarlaıdy atalmysh joǵary oqý ornynynyń baspasóz qyzmetinen.

Qazaqstanda mundaı taqyryptaǵy shara tuńǵysh ret uıymdastyrylyp otyr. Buǵan deıin ol AQSh, Germanııa, Reseı, Ispanııa, Frantsııa jáne Italııa syndy elderde bolǵan. Halyqaralyq uıymdastyrý komıtetiniń mundaı joǵary dárejedegi ǵylymı forýmdy Qazaqstanda ótkizý týraly sheshimi - otandyq ǵalymdardyń álemdik ǵylymǵa qosqan úlesterin joǵary baǵalaǵandyǵyn bildiredi.

Shaqyrylǵan qonaqtardyń ishinde plazma fızıkasy boıynsha esimderi álemge áıgili klassık ǵalymdar bar. Olar: Verner Ebelıng jáne Gerd Repke (Germanııa), Doıch Klod (Frantsııa), Gabor Kalman (AQSh), Osamý Ishıhara (Japonııa). Konferentsııanyń qurmetti qonaǵy - Reseı ǵylym akademııasynyń prezıdenti, fızıka-matematıka ǵylymdarynyń doktory, professor Vladımır Fortov. Ol plenarlyq otyrysta baıandama jasaıdy.

Forýmnyń mańyzdylyǵy óte joǵary. Óıtkeni, kóptegen zamanaýı joǵary tehnologııalyq óndirister plazmalyq tehnologııaǵa negizdelgen (chıpter óndirisi, mıkro jáne nanotehnologııa, ıadrolyq jáne termoıadrolyq energetıka, ǵarysh tehnologııasy jáne taǵy basqalar ). Olardyń ǵylymı negizi, árıne plazma fzıkasy.

Aıta ketelik, «Tompson Roıters» derekqorynyń málimdemesine sáıkes, plazma fızıkasy salasynda eńbek etetin qazaqstandyq ǵalymdardyń aldyńǵy qatarly álemdik ǵylymı basylymdarda jarııalanǵan eńbekterine kúni búginge deıin sheteldik ǵalymdar tarapynan 2 myńnan asa silteme jasalypty. Bul úlken kórsetkish, - deıdi mamandar.