QazUÝ-dyń jańa serpini
ALMATY. Aqpannyń 4-i. QazAqparat / Ádilet Musahaev / - Jaqynda Qazaqstan Respýblıkasy Bilim jáne ǵylym mınıstrligininiń Ulttyq akkredıtatsııalyq ortalyǵy tuńǵysh ret halyqaralyq úlgi boıynsha joǵary oqý oryndary akkredıtatsııasynyń qorytyndysyn shyǵardy.
Otandyq oqý oryndarynyń ishinde ulttyq akkredıtatsııany Ál-Farabı atyndaǵy Qazaq ulttyq ýnıversıteti alǵashqy bolyp sátti ótti, dep habarlaıdy QazAqparat QazUÝ-niń baspasóz qyzmetine silteme jasap.
Instıtýtsıonaldy akkredıtatsııa - ýnıversıttiń ózin-ózi baǵalaýy men JOO qyzmetiniń syrtqy baqylaýy negizinde júrgiziletin Bolon úderisi aıasyndaǵy mindetti shara. Ál-Farabı atyndaǵy Qazaq ulttyq ýnıversıtetinde bul sharany belgili ǵalym, Reseıdiń federaldy akkredıtatsııalyq ortalyǵynyń jetekshisi Vladımır Navodnovtyń basshylyǵymen Qazaqstan Respýblıkasy Bilim jáne ǵylym mınıstrligininiń Ulttyq akkredıtatsııalyq ortalyǵy júrgizgen.
Táýelsiz komıssııa jetekshi oqý orny qyzmetiniń barlyq salasymen jan-jaqty tanysyp, Ál-Farabı atyndaǵy QazUÝ joǵarǵy oqý oryn salasyndaǵy ulttyq saıasatqa jáne halyqaralyq standarttarǵa, sonymen qatar eldiń áleýmettik-ekonomıkalyq, ǵylym-bilim men mádenı damýyna sáıkes keletin, mıssııasy, mindeti men maqsaty jaqsy qalyptasqan degen qorytyndyǵa keldi.
Odan ózge sheteldik jáne otandyq JOO-y, akademııalyq qoǵamdastyq pen qazaqstandyq úkimettik emes uıymdardyń ókilderinen quralǵan sarapshylar toby ǵylymı izdenisterdiń joǵary deńgeıin, bilim sapasyn, ýnıversıtet kampýsynyń damýyn, sonymen qatar stýdentterdiń oqýy men turmysy jaǵdaıynyń jaqsy ekendigin atap ótti. Almatydaǵy ýnıversıtettik Internet-ortalyqtyń úlgisimen tanysqan soń, táýelsiz sarapshylar aqparattyq tehnologııalardy endirýde JOO-nyń tehnıkamen jaqsy jabdyqtalǵandyǵyn basa aıtqan.
UAO-nyń akkredıtatsııalyq komıteti 3 aqpan kúni Qazaqstan Respýblıkasy Bilim jáne ǵylym mınıstrligininiń keńeıtilgen otyrysynda sońǵy qorytyndy sheshimin shyǵaryp, onda Bilim jáne ǵylym mınıstri Janseıit Túımebaev Ál-Farabı atyndaǵy QazUÝ-dyń rektory Baqytjan Jumaǵulovqa ınstıtýtsıonaldy akkredıtatsııany sátti ótkendigi týraly birinshi sertıfıkatty tapsyrdy.
