QazUÝ-dyń ǵylymı jýrnaly halyqaralyq derekter bazasyna endi

ASTANA. QazAqparat - Aqparattyq júıeler men zııatkerlik menshik toptamalaryn basqaratyn «Clarivate Analytics» halyqaralyq agenttiginiń málimeti boıynsha, ál-Farabı atyndaǵy QazUÝ-dyń «International Journal of Biology and Chemistry» atty bıologııa jáne hımııa boıynsha ǵylymı jýrnaly «Web of Science Core Collection»-tiń jańa ǵylymı derekter bazasyna endi. Bul týraly QazAqparat ýnıversıtettiń baspasóz qyzmetine silteme jasap habarlaıdy.

Elimizdegi jetekshi ýnıversıtet jýrnalynyń álemdegi úzdik ǵylymı basylymdardy ındeksteıtin bedeldi halyqaralyq derekter bazasyna enýi -qazaqstandyq joǵary bilim men ǵylymnyń kezekti bıik jetistigi. 

«QazUÝ zertteý ýnıversıtetine aınala otyryp, Elbasynyń álemniń 200 úzdik top joǵary oqý oryndarynyń quramyna ený jónindegi mindetterin sátti oryndaý maqsatynda qarqyndy jumys atqarýda. Biz qazaqstandyq ǵalymdardyń zertteýlerin jetildirýge múmkindik berip, álemdik ǵylymda laıyqty orynǵa ıe bolýǵa tyrysamyz», - dep atap ótti QazUÝ-dyń ǵylymı-ınnovatsııalyq jumys jónindegi prorektory Tilekqabyl Ramazanov.

Aıta keterlik jaıt, QazUÝ hımııalyq jáne bıologııalyq, hımııalyq jáne tehnologııalyq, sondaı-aq fızıkalyq jáne matematıkalyq baǵyttardaǵy ǵylymı jýrnaldary halyqaralyq ǵylymı derekter bazasyna engen Ortalyq Azııadaǵy alǵashqy halyqaralyq ýnıversıtetterdiń biri.