QazUÝ-dyń stýdentter saraıynyń bir bóligi opyrylyp tústi

Turǵyndardyń sózinshe, oqıǵa 23 qyrkúıek 23:00–den keıin Tımırıazev kóshesinde bolǵan. Olar daýys aýdanǵa estilgenin aıtady. Bul ýaqytta jóndeý jumystary júrgizilmegen. Kýágerler oqıǵadan keıin jarty saǵat ótse de, polıtsııa men órt sóndirýshilerdiń kelmegenin jazdy.

Kópshilik muny ál-Farabı atyndaǵy Qazaq ulttyq ýnıversıtetiniń stýdentter saraıy dep boljady.

Al ýnıversıtettiń baspasóz qyzmeti stýdentter saraıyna rekonstrýktsııalaý júrgiziletinin málimdedi.

Ýnıversıtettiń málimetinshe, Stýdentter saraıynyń qurylysy 1985 jyly bastalyp, 1998 jyly aıaqtalǵan. Ǵımarat paıdalanýǵa berilgennen keıin shamamen 30 jyl boıy kúrdeli jóndeýden nemese rekonstrýktsııadan ótpegen.

— 2023 jyly akkredıttelgen uıym ǵımarattyń tehnıkalyq jaı-kúıine saraptamalyq tekserý júrgizdi. Onyń nátıjesinde birqatar eleýli aqaý men zaqym bolǵan jerler anyqtaldy, — dep habarlady QazUÝ baspasóz qyzmeti.

Atap aıtqanda, tekserý barysynda temirbeton rıgelderiniń bir bóliginiń joqtyǵy, baǵandardyń korrozııaǵa ushyrap, keı jerlerde qısaıýy, rıgelder men baǵandardyń túıisý oryndarynyń buzylýy, sondaı-aq temirbeton konstrýktsııalarynyń maıysýy men deformatsııalary anyqtalǵan.

Sonymen qatar ǵımarat qasbetiniń jylý oqshaýlaý qabatynyń buzylǵany jáne shatyrdyń metall konstrýktsııalarynda korrozııa men jergilikti deformatsııalar bary anyqtalǵan.

Ýnıversıtettiń habarlaýynsha, anyqtalǵan aqaýlardyń basym bóligin ǵımarattyń ishki árýin bólshektemeı, ony syrttaı anyqtaý múmkin bolmaǵan. Sol sebepti keshendi rekonstrýktsııa júrgizý qajettigi týyndaǵanyn atap ótti.

— Stýdentter saraıynyń tarıhı-mádenı qundylyǵyn, onyń qoǵamdyq ortalyq jáne mádenı-kópshilik sharalardy ótkizetin alań retindegi mańyzyn tereń túsine otyryp, bul nysandy saqtap qalý jáne qalpyna keltirý týraly sheshim qabyldandy, — delingen resmı málimdemede.

Eske salaıyq, Ál-Farabı atyndaǵy QazUÝ-ǵa qaıtarylǵan aýmaqtaǵy bıznes-ortalyq súrilýi týraly habarlandy.