QazUÝ-diń hımııa fakýlteti jyldyń úzdigi atandy
ALMATY. Mamyrdyń 19-y. QazAqparat /Ádilet Musahaev/ - Bıylǵy oqý jylynyń nátıjesi boıynsha «Ál-Farabı atyndaǵy QazUÝ-diń úzdik fakýlteti» baıqaýynda hımııa fakýlteti jeńimpaz atandy.
Bul jóninde atalmysh ýnıversıtet Ǵylymı keńesinde ótken otyrysta málim boldy.
QazUÝ-diń atalmysh baıqaýdy uıymdastyrýdaǵy basty maqsaty - Elbasynyń talaby boıynsha otandyq bilim berý salasynda bilikti de básekege qabiletti mamandardy daıyndaý jáne qazaqstandyq joǵary oqý ordalarynyń álem reıtıngine kirýin qadaǵalaý.
«Ál-Farabı atyndaǵy QazUÝ-diń úzdik fakýlteti» baıqaýyn ekinshi jyl qatarynan uıymdastyryp otyrmyz. Osy dástúrli sharanyń arqasynda QazUÝ-de básekelestik ornady. Bul fakýltetter jumysyn sapalandyra túsedi, ári kásibı sheberlikterin shyńdaıdy, deıdi ýnıversıtet rektory Baqytjan Jumaǵulov.
«QazUÝ-dyń úzdik fakýlteti-2010» baıqaýynda professor Muhambetqalı Búrkitbaev basqaratyn hımııa fakýlteti úzdik atanyp otyr. Jeńimpazdar ýnıversıtet rektorynyń Qurmet gramotasy jáne baǵaly syılyqtarmen marapattaldy. Al ekinshi orynǵa bıologııa fakýlteti, úshinshi orynǵa shyǵystaný fakýlteti laıyq dep tanyldy.
Ýnıversıtet ǵylymı keńesiniń aıtýynsha, hımııa fakýlteti ár salada da joǵary kórsetkish kórsetken. Máselen, nanotehnologııa salasy boıynsha usynylǵan 14 baıqaý jumysynyń 7-ýin QazUÝ-diń hımııa fakýlteti jeńip alǵan. Fakýltette oqý jumysy, ádistemelik, ǵylymı jáne tárbıe jumystary boıynsha belsendilik óte joǵary deńgeıde, sonymen qatar halyqaralyq áriptestik nyǵaıyp ózindik bedeldiń qalyptasýy baıqalǵan.
Komıssııa músheleriniń aıtýynsha, baıqaý nátıjesin qortyndylaý kezinde fakýltetterdiń oqý ǵımarattary men stýdenttik jataqhanalarynyń da jaǵdaıy eskerilgen. Sonymen birge, eńbek jumystaryn oryndaý men jaýapkershilik deńgeıi de nazardan tys qalmaǵan.
