QazUÝ-diń grant bóliminde bilim alatyn talapkerler sany ótken jyldaǵydan artyp otyr
ALMATY. Tamyzdyń 3-i. QazAqparat /Ádilet Musahaev/ - Aǵymdaǵy jyly QazUÝ-diń grant bóliminde oqýǵa talap bildirgen qujat tapsyrýshylardyń sany ótken jyldaǵydan anaǵurlym artyp, 5277 adamǵa jetti.
Bul jaıynda Ál-Farabı atyndaǵy QazUÝ-dyń memlekettik kabyldaý komıssııasynyń tóraǵasy Zýlfuhar Ǵaıypov málim etti, dep habarlaıdy QazAqparat.
Onyń aıtýynsha, bıyl ýnıversıtettiń mehanıka-matematıka, fızıka, bıologııa, hımııa, ekonomıka fakýltetterine qyzyǵýshylyq tanytyp, qujat tapsyrǵandardyń sany óte kóp. «Osy oqý jylynda ýnıversıtetimiz radıotehnologııa-telekommýnıkatsııa bólimi boıynsha birinshi ret bilim bergeli otyr. Oǵan memleket tarapynan 450 grant bólingen jáne osy mamandyqty ıgerem deýshilerdiń qatarynyń kóptigi bizdi qýantyp otyr», deıdi Z. Sultanuly.
Sondaı-aq Z. Ǵaıypov bıylǵy qujat tapsyrýshy talapkerlerdiń jınaǵan baldary jyldaǵydan joǵary ekendigin, ári respýblıka boıynsha 2500 altyn belgi ıegerleriniń besten biri osy atalmysh oqý ornynan bilim alýǵa tilek bildirgenin jetkizdi.
«Sapaly bilimmen qamtamasyz etý jónindegi qazaqstandyq táýelsiz agenttiktiń qorytyndysy boıynsha Ál-Farabı atyndaǵy Qazaq ulttyq ýnıversıteti qazaqstandyq 132 joǵary oqý oryndary ishinde álemdik bilim keńistiginde básekege tótep beretin Qazaqstandaǵy eń úzdik ýnıversıtet dep tanylyp, 2010 jylǵy reıtıngtik kórsetkish boıynsha birinshi oryndy ıelendi», dep atap ótti óz sózinde komıssııa tóraǵasy.
Ótken jyly atalmysh ýnıversıtet 2586 memlekettik bilim granty ıegerin oqýǵa qabyldap, qabyldaý naýqanynyń kóshbasshysy bolyp tanylǵan edi. Olardyń basym kópshiligi - «Altyn belgi» ıegerleri jáne erekshe úlgidegi attestat pen halyqaralyq olımpıada jeńimpazdary.
