QazUÝ-de Túlekter kúni atap ótilýde
ATY. 28 mamyr. QazAqparat /Ádilet Musahaev/ - Búgin Almatyda ál-Farabı atyndaǵy QazUÝ túlekteriniń kúni atalyp ótilýde.
Ál-Farabı atyndaǵy Qazaq ulttyq ýnıversıtetiniń Túlekter qaýymdastyǵy ár jyldaǵy ýnıversıtet túlekterin 28 mamyrda QazUÝ qalashyǵynda ótetin jalpy ýnıversıtettik Túlekter kúnine shaqyrǵan.
Elimizdegi bedeldi joǵary oqý ornynyń tarıhynda bul taǵy bir tyń bastama bolyp otyr. Ál-Farabı atyndaǵy QazUÝ Ǵylymı keńesiniń sheshimimen bul mereke jyl saıyn mamyr aıynyń sońǵy senbisinde dástúrli túrde toılanbaq.
Merekelik jıynǵa kelgender aldymen ál-Farabı men Ó.Joldasbekov eskertkishterine gúl shoqtaryn qoıýdan bastady. Stýdentter saraıynda Túlekter kúniniń saltanatty ashylýyn QazUÝ rektory Ǵalymqaıyr Mutanov óziniń quttyqtaý sózimen ashty. Sondaı-aq saltanatty ashylý barysynda úzdik túlekter marapattalyp, Qurmanǵazy atyndaǵy halyq aspaptar akademııalyq orkestriniń kontserti boldy. Odan keıin túlekter óz kýrstastary jáne toptastarymen kezdesip, aýdıtorııalarǵa bas suǵyp, stýdenttik ómirdiń qyzyqty sátterin esterine aldy, jańadan salynǵan oqý ǵımarattaryn tamashalap, QazUÝ tarıhy murajaıymen tanysty.
Sondaı-aq ár fakýltette jeke baǵdarlamalar uıymdastyrylǵan. Merekelik kesh saǵat 19.00-de QazUÝ qalashyǵynyń Bas alańynda birinshi ret ótetin Túlekter balymen qorytyndylanbaq.
