QazUÝ-de Oljas Súleımenov atyndaǵy ǵylymı ortalyq ashylady
ALMATY. 20 mamyr. QazAqparat - Almatydaǵy ál-Farabı atyndaǵy Qazaq ulttyq ýnıversıtetinde keshe BUU-nyń Bilim, ǵylym jáne mádenıet jónindegi uıymynyń Qazaqstandaǵy ókili Oljas Súleımenovpen kezdesý ótti.
Sondaı-aq fılologtar men lıngvısterge «Sózdi súıý» dep atalatyn sheberlik synyby uıymdastyryldy. Onda túrkitanýshy ǵalym fılologııa, ádebıettaný jáne álem tilderi fakýltetiniń oqytýshylaryna jáne jas zertteýshiler men lıngvısterge ejelgi túrkter, túrki rýnıkasy jáne ózge de jazýlar men jazbalardyń, uǵymdardyń shyǵý tórkini týraly baıandap berdi. Óziniń bul baǵyttaǵy zertteýleri boıynsha "Myń bir sóz" dep atalatyn kitap daıyndap jatqandyǵyn jetkizdi.
"Afrıkanyń ekvator beldeýinen júzdegen myń jyl buryn eńse kótergen adamzat - ult pen ulysqa bóline-bóline - áýeli soltústik Afrıka, sosyn Jerorta teńizi, Taıaý Shyǵysty jaılap dúnıege sóz taratty. Zamanalar belesinde - otbasy sheńberinen shyǵyp -makrogrýppa - úlken top degen uǵymǵa ulasty. Uly kósh mıllıondaǵan jylǵa sozylyp, jańa sóz - leksıka shoǵyryn, sóz galaktıkasyn týǵyzdy", - deıdi O.Súleımenov.
Kezdesýde ýnıversıtet rektory Ǵalym Mutanov joǵary oqý ornynyń geografııa fakýltetiniń 1959 jylǵy túlegine «Ál-Farabı» altyn medalin tapsyrdy. Sonymen qatar aldaǵy ýaqytta endi Oljas Omaruly atyndaǵy ǵylymı ortalyq ashylatynyn jetkizdi. Al belgili mádenıet jáne qoǵam qaıratkeri, túrkitanýshy O.Súleımenov onda jas lıngvısterge ǵylymı jetekshilik jasap, til bilimin úıretpek.
