QazUÝ-de áıelder uıymyn tuńǵysh qurǵan professor Maıa Baǵysbaeva atyndaǵy aýdıtorııa ashyldy
ALMATY. 1 naýryz. QazAqparat /Ádilet Musahaev/ - Akademık Ómirbek Joldasbekov sımpozıýmy aıasynda ál-Farabı atyndaǵy Qazaq ulttyq ýnıversıtetiniń fılologııa fakýltetinde fılologııa ǵylymdarynyń doktory, bilim ordasynda áıelder uıymyn tuńǵysh qurǵan professor Maıa Muhammedálıqyzy Baǵysbaeva atyndaǵy aýdıtorııanyń saltanatty ashylýy boldy.
Zamandasynyń qaıratkerligin ulyqtaı kelgen KSRO halyq ártisi, Sotsıalıstik Eńbek Eri Bıbigúl Tólegenova jáne ıgi sharanyń oryn alýyna uıytqy bolyp otyrǵan QazUÝ rektory Ǵalymqaıyr Mutanov professor atyndaǵy aýdıtorııanyń tusaýyn kesti.
Bıbigúl Tólegenova Maıa Baǵysbaeva ýnıversıtette qyzmet etken jyldary onymen jıi aralasyp turǵandyǵyn, ózara bas qosyp, sol kezde, ásirese bolashaq ana - qyz bala tárbıesi týraly keńinen keńeskenderin aıta kele: "Maıa - óte ulaǵatty adam. Onyń analyq qasıeti qandaı bıik edi. Sol qasıeti onyń otbasyn da úlgili etti. Ol - akademık Ómirbek Joldasbekovtiń jary. Ekeýi de ulaǵatty jandar. Búginde urpaqtary olardyń izin jalǵap otyr", - dedi.
Alashtyń "bulbulynan" keıin Maıa Muhammedálıqyzynyń qaıratkerligi, ustazdyǵy, eńbek joly týrasynda aıtylǵan estelikter legi jalǵasa berdi. Keıingi urpaqqa ólsheýsiz asyl mura qaldyrǵan ustaz jaıly rektor Ǵalymqaıyr Mutanuly: "Ulaǵatty isti ulyqtaýda estelikter túrli bolady. Ol kitap bolýy múmkin nemese memorıal, eskertkish taqta bolaýy múmkin. Endeshe biz búgin ǵylymı, tárbıelik mańyzy bar estelikke kýá bolyp otyrmyz. Professor Maıa osy shańyraqta óz shákirtterin qanattandyryp, kelbetin qalyptastyryp ketti. Bul aýdıtorııada ol zerthanalyq jumystarmen aınalysyp, ǵylymı mektep ornatty. Endeshe mundaı aýdıtorııanyń ashylýy úlken tárbıelik mánge ıe. Maıa eńbekterin ádebıetpen baılanystyratyn bolsaq, akademık Ómirbek Aryslanulynyń tulǵasy da osy aýdıtorııamen baılanysy bar", - dep atap ótti.
Ómirden ótse de, óshpes mura qaldyrǵan ǵalym eńbeginiń bulaısha ulyqtalýy ustaz eńbeginiń máńgilik ekendigin aıqyndady.
Saltanatty sharaǵa sonymen qatar QR Ulttyq Injenerlik ǵylym akademııasynyń prezıdenti, akademık Murat Jurynov jáne fılologııa fakýltetiniń dekany, professor Qanseıit Ábdezuly, fakýltettiń ǵalymdary qatysty.
