QazUÝ-de áıelder kúnine arnalǵan merekelik kesh ótti

Ó.A.Joldasbekov atyndaǵy Stýdentter saraıynda uıymdastyrylǵan keshtiń kórkin bul joly arnaıy sahna sańlaqtary emes, er adamdardan quralǵan ýnıversıtettegi oqytýshy-professorlar quramy, prorektorlar, rektorat qyzmetkerleri, bólim bastyqtary, fakýltet dekandarynyń tárbıe jumysy jónindegi orynbasary keltirdi.

Ardaqty apa, aıaýly ana, súıikti qaryndas merekesine arnap tek er-azamattarymyzdyń óner kórsetýi QazUÝ tarıhynda tuńǵysh ret rektor Ǵalymqaıyr Mutanulynyń bastamasymen júzege asyp otyr eken.

QazUÝ ujymyndaǵy erler tarapynan keshte analarǵa, arýlarǵa, názik jandarǵa arnalyp óleńder oqyldy, jyr jyrlanyp, aqyndardyń áıel taqyrybyna arnalǵan satıralary tyńdaldy. Sonymen qatar serilerimiz zamanaýı bı bılep, kóńildi ázildermen bólisti. Saraı ishindegi kórermenderdiń qalyń qolpashtaýy men ystyq yqylasy «jumaq - ana tabanynyń astynda» dep aıaýly da asyl jandardyń meıramyn ulyqtap, merekelik kóńil kúı syılaǵan qazuýlyq azamattarǵa «bizdiń aýyl jigitteri -jigitterdiń tóresi» degen rızashylyq tanytyp turdy.