QazUÝ-daǵy jalpy jáne etnıkalyq pedagogıka kafedrasynyń ashylǵanyna 70 jyl toldy
ALMATY. 8 aqpan. QazAqparat /Ádilet Musahaev/ - Búgin Almatydaǵy QazUÝ-dyń fılosofııa jáne saıasattaný fakýlteti quramyndaǵy jalpy jáne etnıkalyq pedagogıka kafedrasynyń 70 jyldyq mereıtoıyna oraı «Klassıkalyq jáne zertteý ýnıversıtetterindegi pedagogıka: qazirgi jaı-kúıi, úrdisteri men damý bolashaǵy» atty dóńgelek ústel ótti.
Atalǵan fakýltettiń dekany Aqtolqyn Qulsarıevanyń aıtýynsha, sharanyń negizgi maqsaty - aǵymdaǵy bilim berý jaǵdaıyndaǵy pedagogıka ǵylymynyń damý kókjıekterin anyqtaý ári kásibı sheberlikti meńgerý jáne qalyptasqan pedagogıkalyq strategııalardy baǵalaý.
Alqaly jıyndy A.Qulsarıeva óziniń quttyqtaý sózimen ashyp, 1940 jyly qurylǵan jalpy jáne etnıkalyq pedagogıka kafedrasyna ár jyldary Tólegen Tájibaev syndy elimizge tanymal, qazaq ǵylymyna ózindik úles qosqan adamdar basshylyq etkendigin jáne olardyń eren eńbegi jaıly sóz qozǵady. Sonymen qatar kafedranyń birqatar oqytýshylaryn maqtaý qaǵazdarymen marapattap, atalǵan kafedraǵa fakýltet atynan noýtbýkty syıǵa tartty.
Sondaı-aq jıyn barysynda "Qoǵamnyń áleýmettik-ekonomıkalyq, mádenı damý jaǵdaıyndaǵy klassıkalyq jáne zertteý ýnıversıtetteriniń rólderin talqylaý", "Joǵary oqý oryndary arasyndaǵy bilim jáne pedagogıkalyq ınnovatsııalar boıynsha tájirıbe almasý", "Klassıkalyq jáne zertteý ýnıversıtetterindegi pedagogıkanyń qazirgi jaǵdaıyn baǵalaý" syndy taqyryptarda baıandamalar oqylyp, keńinen talqylandy.
Jıynǵa túrli ýnıversıtet, akademııa, ınstıtýt, pedagogıkalyq ujym ókilderi, bilim berý salasy men ǵylymı-ádistemelik ortalyq mamandary, ǵalymdar, magıstranttar jáne stýdentter qatysty.
