QazUÝ-daǵy eski telestýdııa jańa kelbetke endi
ALMATY. KAZINFORM – Búgin, 10 qazanda ál-Farabı atyndaǵy Qazaq ulttyq ýnıversıtetiniń jýrnalıstıka fakýltetinde professor Marat Barmanqulov atyndaǵy telestýdııa jańartylyp, qaıta ashyldy.
Professor Marat Barmanqulovtyń qyzy Alýa Barmanqulova telestýdııaǵa jyl saıyn keletinin, biraq bul joly jańarǵan stýdııany tanymaı qalǵanyn aıtty.
– Ál-Farabı atyndaǵy Qazaq ulttyq ýnıversıtetiniń jýrnalıstıka fakýlteti jyl saıyn ákemniń týǵan kúnin «Barmanqulov oqýlarymen» atap ótedi. Ár joly otbasymyzdyń bir múshesin arnaıy shaqyrady. Bizdi umytpaı, árdaıym qurmetpen shaqyratynyna rızamyz. Al telestýdııanyń qazirgi kelbeti erekshe áser qaldyrdy. Jóndeý jumystary da, jańa tehnıkalyq jabdyqtar da kóńilimnen shyqty, - dedi ol.
Jýrnalıstıka fakýltetiniń dekany Qanat Áýesbaıdyń aıtýynsha, búgingi stýdentter podkast jazýǵa, mýltımedıalyq kontent jasaýǵa erekshe qyzyǵýshylyq tanytyp otyr.
– Munda stýdentterimiz teorııa júzinde alǵan bilimin tájirıbemen ushtastyra alady. Aldaǵy ýaqytta bul telestýdııada túrli podkastar, suhbattar men telesıýjetter daıyndalady. Biz bul aýdıtorııanyń fakýltettiń turaqty zerthanalyq ári óndiristik bazasyna aınalatynyna qýanyshtymyz. Sol maqsatta zamanaýı kameralar satyp alynyp, jaryq júıesi tolyq jańartyldy. Endi stýdentter tórt túrli alańda óz stendaptaryn túsirip, suhbat jáne habar daıyndaı alady, - dedi Qanat Áýesbaı.
Marat Barmanqulov – Qazaqstandaǵy tele-radıojýrnalıstıkanyń negizin qalaǵan tulǵa. 1966 jyly ol QazUÝ jýrnalıstıka fakýltetinde alǵashqy televızııalyq zerthana men teleradıojýrnalıstıka kafedrasyn qurdy. Sol kezdegi telestýdııada bar bolǵany bir beınekamera men montaj ústeli ǵana bolǵan.
90-jyldardyń ortasynda ıÝNESKO-nyń qoldaýymen stýdııa zamanaýı tehnıkalyq quraldarmen jabdyqtalyp, oqý protsesinde telejýrnalıstıka pánderin tájirıbelik turǵyda oqytýǵa múmkindik týdy.
2009 jyly zerthana Marat Barmanqulov atyndaǵy QazUÝ teleradıokesheni (TRK) mártebesin alyp, stýdentter men oqytýshylar úshin shyǵarmashylyq jáne kásibı tájirıbe alańyna aınaldy. Munda telejýrnalıstıka, beınemontaj jáne televızııalyq baǵdarlamalar daıyndaý boıynsha sabaqtar ótkiziledi.
2025 jyly telestýdııa tolyq kúrdeli jóndeýden ótip, zamanaýı beıne jáne dybys jabdyqtarymen jańartyldy. Endi stýdentter jańa formattaǵy televızııalyq jáne mýltımedıalyq jobalar ázirlep, derekti fılmder men podkasttar daıyndaýǵa múmkindik alady.
Eske salaıyq, buǵan deıin ál-Farabı atyndaǵy QazUÝ bazasynda Haınan spýtnıktik derekter ortalyǵy jáne Qytaıdyń Soltústik-batys polıtehnıkalyq ýnıversıtetimen birlesken jerústi spýtnıktik stantsııasy salynatynyn habarlaǵanbyz.