QazUÝ-da Jas ǵalymdar úıi ashyldy

Atalmysh oqý orny baspasóz qyzmetiniń habarlaýynsha, bul Qazaqstandaǵy magıstranttar men doktoranttarǵa arnalǵan alǵashqy turǵyn úı kesheni. Áleýmettik mańyzy bar nysannyń qurylysyna memlekettik-jekemenshik áriptestik negizinde ınvestıtsııalar tartyldy.

«Bizdiń keshen ózge ýnıversıtetterge úlgi bolarlyqtaı. Sebebi Qazaqstandaǵy joǵary oqý oryndarynda mundaı turǵyn úı nysany joq. Ýnıversıtet basshylyǵy jas ǵalymdardyń turǵyn úı máselesin óte kóp kóńil bóledi. Al ol óz kezeginde sapaly kásibı maman daıyndaýda oń nátıje berýde», - dedi QazUÝ-dyń birinshi prorektory Muhambetqalı Búrkitbaev.

Turǵyndardyń qýanyshynda shek joq. Endi olar kommertsııalyq baspana izdep áýre bolmaıdy, onyń ústine qarjylaryn da birshama únemdemek. Ekonomıkalyq turaqsyzdyq jaǵdaıynda bul jastardy qoldaýǵa baǵyttalǵan aýqymdy joba. Onyń ústine turǵyn úı kesheni barlyq zamanaýı talaptarǵa saı. QazUÝ magıstranttary men doktoranttary búginde jaıly bólmelerde qonys toıyn toılaýda.

Ár qabatta tolyq jabdyqtalǵan as bólmesi men kir jýatyn jaı qarastyrylǵan. Sonymen qatar, zamanaýı telekommýnıkatsııalyq jyldamdyǵy joǵary Wi-Fi jelisi ornatylǵan, densaýlyq saqtaý pýnkti men bı jáne jattyǵý zaldary da jumys jasaıdy. Jas ǵalymdar úıi qalashyq aýmaǵynda yńǵaıly ornalasqan jáne úıdiń aldynda balalar alańqaıy men avtoturaq bar.

«Biz, jastarǵa, sonyń ishinde stýdent jastarǵa asa úlken kólemde kóńil bólip otyrǵan memleketimizge, prezıdentimizge alǵysymyz sheksiz. Jas ǵalymdar úıi - ekinshi úıimiz. Munda jaıly ómir súrýge arnalǵan qajettiniń bári bar. Onyń ústine jemisti eńbek etýge de barlyq jaǵdaı jasalǵan. Munda jas ǵalymdar bolashaqta úlken-úlken ǵylymı jobalarǵa aınalatyn jańa ıdeıalardy týdyrady», - dedi hımııa jáne hımııalyq tehnologııalar fakýltetiniń doktoranty Aınur Imanǵalıeva.

QazUÝ-da shetel joǵary oqý oryndarynan kelgen professorlardy ǵylymı jetekshilik jasap júrgen stýdentterimen jumys barysynda jıi kezdestirýge bolady. Jalpy aýmaǵy 4,5 myń sharshy metr bolatyn 500 orynǵa shaqtalǵan jas ǵalymdar úıinde professorlarǵa arnalǵan bólmeler de qarastyrylǵan. Sol arqyly jastardyń shyǵarmashylyq jáne ǵylymı áleýetin kóterýge septigin tıgizetin ǵylymı-zııatkerlik orta qalyptasýda.

Bul ýnıversıtet tarapynan memlekettik-jekemenshik áriptestik negizinde salynǵan jalǵyz nysan emes. Ótken jyly jańa kitaphana men «Keremet» stýdentterge qyzmet kórsetý ortalyǵynyń qurylysy aıaqtalǵan bolatyn. Kelesi jyldyń basynda júzý basseıni qoldanysqa beriledi.