QazUÝ-da respýblıkalyq «ál-Farabı» olımpıadasy bastaldy
ALMATY. QazAqparat - QazUÝ-da Respýblıkalyq «ál-Farabı» olımpıadasy bastaldy, dep habarlaıdy QazAqparat tilshisi oqý ordasynyń baspasóz qyzmetine silteme jasaı otyryp.
Bilim dodasyna elimizdiń bilim berý mekemelerinde tálim alyp jatqan 7 myńǵa jýyq 11 synyp oqýshylary qatysýda.
Uıymdastyrýshylardyń aıtýynsha, baıqaýdyń maqsaty elimizdegi eń bilimdi oqýshyny, júzden júırikti anyqtap, olarǵa qoldaý kórsetý. Jasóspirimder birinshi jáne ekinshi kezeńde qashyqtan oqytatyn tehnologııalardy paıdalaný arqyly on-line rejimde ótse, úshinshi qorytyndy kezeńde júzbe-júz saıysady.
Olımpıada qorytyndysy boıynsha júldeli orynǵa ıe bolǵandar tańdaǵan pánderine sáıkes oqý granttaryn alýda eleýli qoldaýǵa ıe bolady.
Atalǵan bilim baıqaýy 2009 jyldan beri ál-Farabı atyndaǵy Qazaq Ulttyq Ýnıversıteti men QR BǴM, «Daryn» ǵylymı-tájirıbelik ortalyǵynyń bastamasymen ótkizilip keledi.
