QazUÝ-da «Nýtrıtsıologııa» kafedrasy ashylmaq
ASTANA. QazAqparat - Ál-Farabı atyndaǵy Qazaq ulttyq ýnıversıteti men Qazaqstan taǵamtaný akademııasy (QTA) yntymaqtastyq kelisimin ornatty. Yntymaqtastyq aıasynda ýnıversıtettegi Qoǵamdyq densaýlyq saqtaý joǵary mektebinde (QDJM) nýtrıtsıologııa kafedrasy (tamaqtaný týraly ǵylym) ashylatyny jóninde QazUÝ rektory Ǵalym Mutanov pen QTA prezıdenti Tóregeldi Sharmanov memorandýmǵa qol qoıdy, dep habarlaıdy Ál-Farabı atyndaǵy Qazaq ulttyq ýnıversıtetiniń baspasóz qyzmeti.
QazUÝ men QTA yntymaqtastyǵy ǵylym men tájirıbe, bilim berý ıntegratsııasy jolynda medıtsınalyq bilim berý sapasyn arttyrý úshin resýrstardyń ıntellektýaldyq jáne tehnıkalyq qabiletin biriktirýge baǵyttalady. QazUÝ-dyń nýtrıtsıologııa kafedrasy óz jumysyn medıtsına ǵylymdarynyń doktory, akademık Tóregeldi Sharmanovtyń jetekshiligimen bastaıtyn bolady.
Álemdik medıtsınalyq ǵylym salasyna qosqan úlesi úshin Leon Bernard atyndaǵy Dúnıejúzilik densaýlyq saqtaý qorynyń laýreaty, professor T.Sharmanov óz sózinde «Elimizdiń jetekshi oqý ordasynda kafedra basqarý - men úshin úlken mártebe. QazUÝ men Akademııanyń birlesken qyzmeti nýtrıtsıologııa, dıetologııa, mıkronýtrıent tapshylyǵy profılaktıkasy salasyndaǵy oqý-bilim, ǵylymı-zertteý, konsaltıngtik jáne sarapshylyq yntymaqtastyǵyna negizdelip otyr», - dep atap ótti.
Sondaı-aq, Sharmanov nýtrıtsıologııa kafedrasynyń ashylýy halyqtyń durys tamaqtaný mádenıeti men durys ómir saltyn qalyptastyrýda mańyzǵa ıe ekenin tilge tıek etti. Bul jumystar dástúrli tehnologııany júzege asyrýǵa, tamaqtaný ındýstrııasyna ınnovatsııalar engizip, taǵam ónimderin óndirýdiń jańa tehnologııalaryn qurastyrýǵa baǵyttalatyn bolady.
Ulttyq oqý orny men Akademııa áriptestigi kúrdeli jáne qoldanbaly medıtsına-bıologııalyq zertteýler júrgizýdi, memlekettik jáne halyqaralyq qoǵamdyq uıymdar men qorlardyń grant baıqaýlaryna qatysýdy, sondaı-aq, nýtrıtsıologııa salasynda álemniń jetekshi mamandarynyń qatysýymen bilimgerler men mamandarǵa arnap bilim berý jáne ǵylymı mektepterin ótkizý tárizdi ortaq qyzmetterdi josparlap otyr.
Sonymen birge, atalmysh yntymaqtastyq tamaqtaný máseleleri boıynsha otandyq qoǵamdyq densaýlyq saqtaýdyń tańdaýly dástúrleri men álem tájirıbesin paıdalanýǵa múmkindik bermek. Keleli kezdesý barysynda Tóregeldi Sharmanov bıe súti men jylqy maıynan ázirlengen ónimdermen tanystyryp ótti. Akademık olardyń ımmýndyq-bıologııalyq jáne emdik-profılaktıkalyq joǵary qasıetin saqtaı otyryp, óndirýdiń ınnovatsııalyq tehnologııasyn baıandap berdi.
