QazUÝ-da Innovatsııalyq jobalar baıqaýynyń jeńimpazdaryna sertıfıkattar tapsyryldy
ALMATY. 17 maýsym. QazAqparat. Ál-Farabı atyndaǵy Qazaq ulttyq ýnıversıtetinde baıqaý jeńimpazdary- otandyq ǵalymdarǵa sertıfıkat tabystaý rásimi ótti. Bul joba QR Bilim jáne ǵylym mınıstrligi men «Tehnologııa kommertsıalızatsııasy» álemdik bankiniń qoldaýymen ótti, dep habarlaıdy oqý ornynyń baspasóz qyzmeti.
Bul jobanyń maqsaty ár saladaǵy mamandyqtar boıynsha ǵalymdardyń zertteýleriniń kommertsııalyq mańyzy men ǵylymı jetistikterin kórsetý bolǵan.
Bir apta boıy AQSh, Germanııa, Saýd Arabııasy, Reseıden kelgen halyqaralyq sarapshylar qazaqstandyq ǵalymdardyń ótinishterin qarady. Nátıjesinde 1 kezeńde jas ǵalymdardyń 5 jobasy jáne aǵa býyn ǵalymdardyń 5 jobasy qarjylandyrýǵa ıe boldy.
Búgin ǵylym jáne jobany kommertsıalızatsııalaý keńesi baıqaýdyń nátıjesin jarııalady. QR Úkimetiniń jáne búkilálemdik banktiń grantyn qazaqstandyq 10 ǵalym - ınnovatsııalyq joba avtorlary ıelendi. Baıqaý jeńimpazdaryna sertıfıkatty QR Bilim jáne ǵylym vıtse-mınıstri Murat Orynhanov tabys etti.
2005 jyldan beri iske asyp kele jatqan baıqaýǵa qatysýshylarǵa M.Orynhanov alǵys bildirdi. «Elimizdiń ǵylymı-zertteý jaǵynan alǵashqy qadam jasaǵandaryńyzǵa men qýanyshtymyn. Osy joba iske asýy úshin kóp ter tógildi, búgingi jetistik sonyń beker emestigin kórsetedi. Sizderdiń tájirıbelerińiz el ekonomıkasyn damytýǵa qyzmet etse, biz únemi qoldaýǵa daıynbyz. Innovatsııanyń damýy - bizdiń artyqshylyǵymyz ben basymdylyǵymyz», - dedi vıtse-mınıstr.
Ǵylym jáne jobany kommertsıalızatsııalaý halyqaralyq keńesiniń tóraǵasy Glenn Shvaıtserdiń aıtýynsha, birinshi kezeńge elimizdegi barlyq ǵylymı ortalyqtardan jalpy 400 joba qatysqan, bulardyń ishinen 335-i tańdalyp alyndy. Іrikteý úrdisi kúrdeli bolǵandyqtan 6 aıǵa ulasqan. Ǵylymı jobalardyń jeńimpazdaryn anyqtaý tuńǵysh ret qazaqstandyq mamandardyń qatysýynsyz halyqaralyq sarapshylar deńgeıinde qarastyrylyp otyr.
Ǵylymı-tehnıkalyq jobaǵa qoıylǵan basty talap Qazaqstannyń ekonomıkalyq damýyna zor úles qosý áleýetine ıe bolý.
Baıqaý qatysýshylarynyń basym kópshiligi Almaty jáne Astana qalalarynan boldy. Sondaı-aq, GFR, Italııa, Latvııa, Reseı jáne Ózbekstan ókilderiniń jumystary da qarastyryldy.
Ǵylymı zertteý jumystary kóbine aýylsharýashylyq (86), farmatsevtıka jáne bıotehnologııa (83) jáne nanotehnologııa (83) salalaryna jasalynǵan.
