QazUÝ-da «Habar» agenttiginiń aýdıtorııasy ashyldy
ALMATY. Qazannyń 7-si. QazAqparat /Erbol Turymbetov/ - Búgin ál-Farabı atyndaǵy Qazaq ulttyq ýnıversıtetiniń jýrnalıstıka fakýltetinde «Habar» agenttiginiń oqý aýdıtorııasy ashyldy.
Aýdıtorııa telearnanyń 15 jyldyq mereıtoıyna oraılastyrylyp ashylyp otyr.
«Biz yntymaqtastyq ári senimdi baılanys ornatý maqsatymen BAQ-qa arnalǵan aýdıtorııalar ashýdy qolǵa alyp otyrmyz. Fakýltet oqytýshylary bul bastamany qoldap otyr. Ashylyp otyrǵan bul aýdıtorııa arqyly stýdentterimiz shyǵarmashylyq sheberlikterin shyńdaıtyn bolady», dedi fakýltet dekany Ǵalııa Ibraeva.
Búginde fakýltette 600 bolashaq jýrnalıst bilim alyp jatyr. Olar úshin fakýltette ýnıversıtet kóleminde taraıtyn zamanaýı teleradıostýdııa jumys isteýde. Dekannyń aıtýynsha, aldaǵy ýaqytta «Kazahstanskaıa pravda» jáne «Egemen Qazaqstan» aýdıtorılaryn ashý josparlanǵan.
