QazUÝ-da «Eń daryndy bolashaq jýrnalıst» taqyrybynda pándik olımpıada ótip jatyr
ALMATY. 8 sáýir. QazAqparat /Ádilet Musahaev/ - Almatydaǵy ál-Farabı atyndaǵy Qazaq ulttyq ýnıversıtetiniń Jýrnalıstıka fakýlteti Qazaqstan Respýblıkasynyń joǵary oqý oryndary arasynda «jýrnalıstıka» mamandyǵy boıynsha «Eń daryndy bolashaq jýrnalıst» taqyrybynda pándik olımpıada ótkizip jatyr.
Atalǵan baıqaýǵa QazUÝ-diń, L. Gýmılev atyndaǵy Eýrazııa ulttyq ýnıversıtetiniń, Abaı atyndaǵy Qazaq ulttyq pedagogıkalyq ýnıversıtetiniń, A. ıAssaýı atyndaǵy Halyqaralyq qazaq-túrik ýnıverıtetiniń, E. Bóketov atyndaǵy Qaraǵandy memlekettik ýnıversıtetiniń, Qorqyt Ata atyndaǵy Qyzylorda memlekettik ýnıversıtetiniń, S. Toraıǵyrov atyndaǵy Pavlodar memlekettik ýnıversıtetiniń, S. Demırel atyndaǵy ýnıversıtettiń, Abylaı han atyndaǵy Halyqaralyq qatynastar jáne álem tilder ýnıversıtetiniń, Orta Azııa mádenıet qory tarapynan qurylǵan Shet tilder jáne iskerlik karera ýnıversıtetiniń komandalary qatysýda.
Olımpıada baǵdarlamasyna joǵary oqý oryndarynyń osy atalǵan mamandyqtarǵa arnalǵan bazalyq pánderi boıynsha test suraqtary engizilgen. Olımpıadany ótkizý jáne baǵalaý erejeleri respýblıkalyq pándik olımpıadalardy ótkizý erejesine sáıkes usynylýda. Olımpıada baıqaýlarynyń qorytyndysy boıynsha ádilqazylar alqasy 1, 2, 3 orynǵa ıe bolatyn úzdik stýdentterdi anyqtamaq. Ádilqazylar alqasynyń quramyna túrli BAQ salasynyń mamandary engizildi.
«Eń daryndy bolashaq jýrnalıst» baıqaýynyń II kezeńinde «Stýdenttiń bir kúni» taqyrybynda jasalǵan beınerolıktiń úzdik jeńimpazdary aıqyndalatyn bolady. Sonymen qatar «Ónerlige óris keń» atalymy boıynsha stýdentter komandasyna án aıtý, bı bıleý, óleń oqý syndy ónerlerin ortaǵa salý múmkindik berilmek. Komandalar bilimin, tapqyrlyǵyn, ushqyrlyǵyn bilý úshin qosymsha tanymdyq suraqtar qoıylatyn bolady.
