QazUÝ-da birinshi ret ashyq túrde kafedra meńgerýshisi laýazymyna taǵaıyndaý baıqaýy ótti
ALMATY. 23 tamyz. QazAqparat /Ádilet Musahaev/ - Keshe Ál-Farabı atyndaǵy Qazaq ulttyq ýnıversıtetiniń rektorat májilisinde kafedra meńgerýshisi laýazymyna taǵaıyndaý baıqaýynyń nátıjesi jarııalandy, dep málimdedi ýnıversıtettiń baspasóz ortalyǵy.
Baıqaýdyń ótetindigi týraly ýnıversıtettiń «Qazaq ýnıversıteti» gazetinde jáne «Kazahstanskaıa pravda» basylymynda jarııalanǵan bolatyn. Baıqaýǵa ótinish bildirgenderdiń arasynda barlyq qoıylǵan talaptarǵa saı kelgen 120-dan astam úmitker qatysqan. Nátıjesinde ýnıversıtettegi kafedra meńgerýshileriniń sany 63-ti quraǵan. Ortasha jas mólsheri 51 jasqa saı keledi eken.
Rektorat májilisinde baıqaý nátıjesi jarııalanyp, Ál-Farabı atyndaǵy Qazaq ulttyq ýnıversıtetiniń rektory men kafedra meńgerýshileri jumys kelisimshartyna qol qoıǵan.
Óz kezeginde QazUÝ rektory Ǵalymqaıyr Mutanov jańa oqý jylynda jańa qyzmetke taǵaıyndalǵan kafedra meńgerýshilerin quttyqtap, burynǵy kafedra meńgerýshileriniń tabysty atqarǵan eńbekterine alǵys bildirip «Qurmet gramotasymen» marapattady.
Rektordyń aıtýynsha, QazUÝ-dyń Ulttyq zertteý ýnıversıtetine aınalý jolynda kafedralar irilenip, nátıjesinde mamandardyń áleýeti artqan. «Kafedralardyń básekege qabilettiligin arttyrý, óz kezeginde ýnıversıtettiń básekege tótep berýin nyǵaıtady. Sol arqyly biz bilim ordasyn álemdik bıik satyǵa kóterýimiz kerek. Ol úshin shyǵarmashylyq pen jańashyldyqqa baı, mádenı orta qalyptastyrýymyz kerek. Búgingi taǵaıyndalǵan kafedra meńgerýshilerimen osy ortany qalyptastyramyz degen senim zor. Ǵylymı klasterler negizinde kafedralar irilenip, fakýltetterdiń ataýy ózgerip, oqý ordasy jańaryp, jańǵyryp otyr. Ál-Farabı atyndaǵy Qazaq ulttyq ýnıversıteti jańa oqý jylyn basqarýdyń jańa úlgisimen bastamaq. Bul úlgi oqý ornynyń álemdik zertteý ýnıversıtetteri qataryna enýine múmkindik beredi», - deıdi Ǵalymqaıyr Mutanuly.
Profesor Qanseıit Ábdezuly baıqaýdyń ashyq, jarııaly túrde ótkendigin, oǵan ýnıversıtetiniń oqytýshy-professorlar quramymen qatar elimizdiń ózge de joǵary oqý oryndarynyń ǵalymdary qatysqandyǵyn jetkizdi. «Іriktep, tańdaý kúrdeli ótti. Naǵyz myqty degen ǵalymdar baq synasty. Bul baıqaýdy ýnıversıtet jolyndaǵy úlken bir tarıhı beles dep aıtýǵa bolady. Mundaı reformalar jaı ózgeris úshin emes, ýnıversıtet bedelin asqaqtatyp, elimizdiń bilimi men ǵylymyn damytý úshin jasalynyp jatqan úlken ǵylymı kúsh bolady», - deıdi profesor.
Rektorat májilisiniń músheleri de ýnıversıtet sannan sapaǵa kóshkenin aıta kele, onyń tarıhynda birinshi ret kafedra meńgerýshisi retinde kelisim-shartqa qol qoıǵan mamandar bul qujat kafedra meńgerýshisiniń quqyqtyq, saıası-moraldik mártebesin kóteretindigin jetkizdi.
