QazUÝ-da Abacus elektrondy brondaý júıesindegi kompıýterlik synyp ashyldy
ALMATY. 17 naýryz. QazAqparat /Ádilet Musahaev/ - Keshe QazUÝ-da geografııa fakýltetinde Global Distribution System (GDS) Abacus elektrondy brondaý júıesindegi kompıýterlik synyby ashyldy,
dep habarlaıdy atalǵan ýnıversıtettiń baspasóz qyzmeti.
Bul synyp ýnıversıtet bazasynda elektrondy brondaý júıesin oqytýdyń Qazaqstandaǵy eń birinshi jáne birden bir mamandandyrylǵan synyby bolyp tabylady. Joba Abacus Central Asia Ltd jáne ál-Farabı atyndaǵy QazUÝ arasynda kelisimshart negizinde iske asyp otyr, ıaǵnı birikken qyzmet arqasynda mamandandyrylǵan týrıstik kadrlardy daıyndaý men qoldanbaly ǵylymı- zertteý jumystaryn qarastyrady.
Abacus kompanııasy oqytý baǵdarlamasymen birge, Internet júıesi arqyly dál sol ýaqytta brondaý protsesin tolyǵymen úlgileıtin, qural-jabdyǵy túgel, lıtsenzııaly baǵdarlamamen qamtamasyz etilgen mýltımedııaly synypty tapsyrǵan. Osy oraıda, týrızm kafedrasynyń segiz oqytýshysy (GDS) Abacus júıesin oqyp, sertıfıkat alǵan. Abacus ókilderimen birge oqý baǵdarlamalaryn eskerip, oqý protsesinde qazaq jáne orys tilinde bilim alatyn toptarǵa qoldanylatyn ádistemelik materıaldar ázirlengen. Búgingi kúni (GDS) Abacus júıesin oqytý «Týrızmdegi aqparattyq qamtamasyzdandyrý» kýrsynyń baǵdarlamasyna engizilgen, alaıda kelesi jyldan bastap Abacus kompanııasymen qosa baǵdarlamalyq jáne ádistemelik qamtamasyz etýdiń negizinde bólek mamandandyrylǵan kýrstyń engizilýi men aldaǵy ýaqytta basqa ýnıversıtetter, týrıstik fırmalar men uıymdardan mamandardy oqytý, týrızm jáne qonaqúı mamandaryn qaıta daıyndaý, biliktilikti kóterý josparlanýda.
Qazirgi aqparattyq tehnologııalardyń bazasynda oqytýdyń ınnovatsııalyq júıelerin engizý negizinde QazUÝ stýdentteri óz aldyna eńbek naryǵynda básekelestigin arttyryp, arnaıy bilim alyp, mamandaný múmkindigine ıe bolady.
Ál-Farabı atyndaǵy QazUÝ-dyń týrızm kafedrasy 2010 jyly respýblıkalyq reıtıng kórsetkishinde maman daıarlaýda birinshi oryn alǵan.
