QazUÝ BUU-nyń Jahandyq habyna tórtinshi merzim qatarynan basshylyq etedi
Bul – turaqty damý maqsattaryn júzege asyrýǵa úlken úles qosyp otyrǵan jetekshi qazaqstandyq ýnıversıtettiń tabysty qyzmetiniń halyqaralyq joǵary deńgeıde moıyndalýynyń dáleli.
BUU-nyń turaqty damý jónindegi «Akademııalyq yqpal» baǵdarlamasy segizinshi Bas hatshy Pan Gı Mýnnyń bastamasy. 2014 jyldan bastap álemdik habty basqarǵan QazUÝ, halyqaralyq deńgeıde osyndaı joǵary mártebege ıe bolǵan TMD-daǵy alǵashqy jáne jalǵyz joǵary oqý orny.
QazUÝ – BUU-nyń 10 dúnıejúzilik habtarynyń biri. Ol álemdik akademııalyq qoǵamdastyqty úılestirip, ǵalamdyq resýrstardy saqtaýǵa, sapaly bilim men ıgilikke qol jetkizýdi qamtamasyz etýge, ınnovatsııalardy damytýǵa, ekojúıelerdi saqtaýǵa baǵyttalǵan adamzattyń turaqty damýynyń 17 maqsatyn iske asyrýǵa belsendi tartýda.
QazUÝ álemniń turaqty damýynyń ózekti máselelerin sheshýge baǵyttalǵan birqatar iri halyqaralyq is-sharalardyń bastamashysy. Ýnıversıtet QR Tuńǵysh Prezıdenti Nursultan Nazarbaevtyń «Jasyl kópir» jáne «G-Global» bastamalaryn qoldaý maqsatynda TMD joǵary oqý oryndarynyń arasynda alǵash bolyp «RIO+20» Jahandyq sammıtinde sektsııasyn ashty. Azııa ýnıversıtetteri rektorlarynyń turaqty damý máseleleri boıynsha ІІІ forýmyn uıymdastyryp ótkizdi.
2018 jyly Astana ekonomıkalyq forýmy aıasynda QazUÝ burynǵy BUU Bas Hatshysy Pan Gı Mýnnyń tikeleı qatysýymen onyń atyndaǵy Turaqty damý ınstıtýtyn ashty. Halyqaralyq akademııalyq uıym retinde, ınstıtýttyń qyzmeti bilim berý, zertteý jáne mádenı-gýmanıtarlyq salalarda halyqaralyq yntymaqtastyq pen kúsh-jigerdi biriktirip, turaqty damý maqsattaryn iske asyrý úshin áriptestikti ilgeriletýge baǵyttalǵan.
QazUÝ Jahandyq habty basqara otyryp, «Ýnıversıtet 4.0» – jańa býyn JOO modelin jasap iske asyrýda. Ol tehnologııalyq jáne rýhanı-adamgershilik platformalardyń sımbıozyna negizdelgen jáne álemniń jaýapty azamattaryn qalyptastyrýǵa baǵyttalǵan. «Órkenıetter Alıansymen» birlese otyryp model Nıý-Iork qalasyndaǵy BUU shtab-páterinde tanystyryldy jáne bolashaǵy kemel, ári ózekti bastama retinde álemniń joǵary oqý oryndary arasynda keń taratýǵa usynyldy.
Qazirgi ýaqytta ýnıversıtette turaqty damý boıynsha, sondaı-aq halyqaralyq jýrnalıstıka jáne qoǵamdyq medıa atty ıÝNESKO kafedralary tabysty jumys isteýde. Sonymen qatar, Kolýmbııa ýnıversıtetimen (AQSh) birlesip, «MDP Global Classroom» turaqty damý boıynsha mamandar daıarlaý baǵdarlamasy jemisti júzege asyrylýda. QazUÝ «BUU Modeli – Jańa Jibek joly» atty dúnıejúzilik stýdenttik jobanyń belsendi qatysýshysy. Jahandyq hab retinde QazUÝ-dyń qyzmeti BUU basshylary tarapynan joǵary baǵa alyp halyqaralyq moıyndaýyna ıe boldy.
BUU Nıý-Iork qalasyndaǵy shtab-páterinen jýyrda QazUÝ-ǵa joldaǵan hatynda «Akademııalyq yqpal» baǵdarlamasynyń jetekshisi Ramý Damodaran ýnıversıtettiń shyn máninde turaqty álem qurýdaǵy mańyzdy mıssııasyn atap ótip, oǵan jemisti jáne tıimdi jumysy úshin alǵys bildirdi.
