QazUÝ Bishkek fılıaly: Qazaqstan – Qyrǵyzstan joǵary bilim yntymaqtastyǵy
ASTANA. KAZINFORM — Ǵylym jáne joǵary bilim mınıstri Saıasat Nurbek pen Qyrǵyz Respýblıkasynyń Ǵylym, joǵary bilim jáne ınnovatsııalar mınıstri Baktııar Orozov ál-Farabı atyndaǵy Qazaq ulttyq ýnıversıtetiniń Bishkek qalasyndaǵy fılıalyna bardy.
Kezdesýge QazUÝ-dyń basqarma múshesi — ǵylymı-ınnovatsııalyq qyzmet jónindegi prorektory Marǵulan Ibraıymov, Qyrǵyz Respýblıkasynyń Ǵylym, joǵary bilim jáne ınnovatsııalar mınıstriniń orynbasary Nurlan Omýrov, sondaı-aq QazUÝ fılıalynyń dırektory Jamın Sheıshenov qatysty.
Mınıstrler ýnıversıtet fılıalynyń qurylý tarıhy, qazirgi qyzmeti jáne damý perspektıvalarymen tanysyp, ǵylymı-zertteý men oqý aýdıtorııalaryn aralady. Sáıkesinshe taraptar akademııalyq almasý, birlesken ǵylymı jobalardy iske asyrý jáne bilim berý salasyndaǵy yntymaqtastyqty keńeıtý máselelerin talqylady.
QazUÝ-dyń Bishkek qalasyndaǵy fılıaly 2022 jylǵy 26 mamyrda ashyldy. Onyń resmı ashylý rásimi Qazaqstan Respýblıkasynyń Prezıdenti Qasym-Jomart Toqaev pen Qyrǵyz Respýblıkasynyń Prezıdenti Sadyr Japarov qatysýymen ótken bolatyn.
Kezdesý barysynda mınıstrler tarapynan naqty usynystar aıtylyp, bolashaqta júzege asyrylýy múmkin bastamalar qozǵaldy. Mınıstr Saıasat Nurbek óz sózinde:
— QazUÝ-dyń aımaqtyq mıssııasy jáne ıntegratsııasy Qazaqstan men Qyrǵyzstan arasyndaǵy strategııalyq áriptestiktiń naqty nátıjesi. Eki eldiń jastaryn sapaly bilimmen qamtamasyz etip, ǵylymı áleýetin arttyrý jolyndaǵy ortaq kúsh-jigerimiz bolashaqta úlken jetistikterge jetkizedi, — dep atap ótti.
Búgingi tańda fılıalda 12 bakalavrıat baǵdarlamasy jáne beıindik magıstratýra boıynsha bilim beriledi. Eń kóp suranysqa ıe mamandyqtar qatarynda — «Quqyqtaný», «Menedjment», «Kompıýterlik ınjenerııa» jáne «Shetel fılologııasy» bar. Qazirgi ýaqytta fılıalda 750-ge jýyq stýdent oqıdy, al 2025–2026 oqý jylyna 630-dan astam talapker qabyldanǵan. Dárister qazaq, orys jáne aǵylshyn tilderinde júrgiziledi.
— QazUÝ-dyń Bishkek qalasyndaǵy fılıaly — jastarymyzǵa sapaly, zamanaýı bilim beretin mańyzdy alań. Basty maqsatymyz — eńbek naryǵynda básekege qabiletti mamandar daıarlaý. Osy baǵytta Qazaqstanmen strategııalyq áriptestikti nyǵaıtyp, bilim berý standarttaryn úılestirýdi jalǵastyramyz, — dedi Qyrǵyz Respýblıkasynyń Ǵylym, joǵary bilim jáne ınnovatsııalar mınıstri Baktııar Orozov.
Aıta keteıik, búginde QazUÝ-dyń sheteldegi fılıaldary Túrkııanyń Ystanbul qalasynda jáne Reseıdiń Omby qalasynda da tabysty jumys istep keledi.
QazUÝ-dyń Bishkek fılıaly — eki eldiń bilim berý keńistigin jaqyndastyratyn mańyzdy kópir.
Aıta ketelik Qyrǵyzstanda Eýrazııa ulttyq ýnıversıtetiniń fılıaly ashylǵany týraly jazǵan edik.