QazUÝ bıylǵy oqý jylynda 4 myń bilim grantyn jeńip aldy
MATY. 17 tamyz. QazAqparat /Ádilet Musahaev/ - Bıyl ál-Farabı atyndaǵy Qazaq ulttyq ýnıversıteti memlekettik tapsyrys boıynsha 4 myń grantty ıelendi,
dep habarlaıdy ýnıversıtettiń baspasóz qyzmeti.
Granttyń 2925-i bakalavrıatta bilim berýge arnalsa, 933-i - magıstratýra, 143-i PhD doktorantýraǵa berilgen. Ýnıversıtetke Bilim jáne ǵylym mınıstrligi ótken jylmen salystyrǵanda bıyl oqý granttaryn magıstratýra men PhD doktorantýraǵa eki ese kóbeıtken.
Qabyldaý komıssııasyna 2010 jyly barlyǵy 7,5 myń talapker tapsyrsa, 2011 jyly 7,9 myń talapker ótinish bildirgen.
Saraptama nátıjesine súıensek, talapkerler tarapynan ınjener mamandyǵyna jáne ǵylymı-jaratylystaný baǵytyna suranys artyp otyr.
Suranysty eskergen ýnıversıtet jańa mamandyqtar ashqan. Olar: nanotehnologııa, logıstıka, kosmos tehnıkasy men tehnologııasy, dızaın, esepteý tehnıkasy jáne baǵdarlamalyq qamtamasyz etý, geologııa jáne tabıǵatty paıdalaný jáne t. b.
QazUÝ-dyń zertteý ýnıversıtetine aınalýy oqý ornynyń barlyq qyzmetin qamtyǵan. Túbegeıli aýysý eń áýeli fakýltetterden bastalǵan. Olar klasterlik turǵydaǵy negizge saı jasalǵan. Ásirese, oqý men ǵylym keńistigi keńeıgeni talapkerlerdi qyzyqtyrýda eken. Mysaly, hımııa fakýlteti qazir «hımııa jáne hımııalyq tehnologııa» dep atalsa, fızıka fakýlteti - «fızıka-tehnıkalyq», bıologııa fakýlteti - «bıologııa jáne bıotehnologııa», geografııa fakýlteti - «geografııa jáne tabıǵatty paıdalaný», tarıh fakýlteti - «tarıh, arheologııa jáne etnografııa», fılologııa fakýlteti - «fılologııa, ádebıettaný jáne álem tilderi» jáne t.b.
Sondaı-aq atalǵan ýnıversıtette jańa joǵary oqý ornyna deıingi daıyndyq fakýlteti ashylǵan.
QazUÝ-da stýdentterdi biliktilikti arttyrý arqyly oqytýdyń jańa modýldik tehnologııalary engizilip, bul jumys berýshilerdiń talaptaryn da eskere otyryp jasalynǵan.
Jańa oqý jylynda ýnıversıtet janynan joǵary synyp oqýshylaryna arnaıy mektep-lıtseı ashylmaq. Elimizdegi bedeldi ýnıversıtetinde oqyp, bilim alǵysy keletinder úshin bul úzdiksiz bilim alýda, álemdik eńbek naryǵynda joǵary bilikti maman bolý úshin úlken múmkindik: «mektep-lıtseı - kolledj - bakalavrıat - magıstratýra - doktorantýra PhD».
