QazUÝ bes myńnan astam stýdentke jataqhanadan oryn beredi - M. Nurǵazın
MATY. 1 qyrkúıek. QazAqparat /Ádilet Musahaev/ - Almaty qalasy, Qarasaı batyr kóshesinde ornalasqan ál-Farabı atyndaǵy Qazaq ulttyq ýnıversıtetiniń №14 jataqhanasy bıyl kúrdeli jóndeý jumystarynan ótip, zamanaýı qural-jabdyqpen qamtamasyz etildi.
Stýdenttik baspanada ýnıversıtettiń halyqaralyq qatynastar, shyǵystaný fakýltetteriniń stýdentteri men daıyndyq fakýltetinde oqıtyn sheteldik azamattar turatyn bolady. Jańadan boı kótergen stýdentter úıi jańa oqý jylynda paıdalanýǵa berildi.
Elbasy Nursultan Ábishulynyń tapsyrmasy boıynsha QR Bilim jáne ǵylym mınıstri Baqytjan Jumaǵulovtyń basshylyǵymen stýdentterdi jataqhanamen qamtamasyz etýge baılanysty 2011-2015 jyldarǵa arnalǵan «Stýdenttik baspana» baǵdarlamasy ázirlengeni belgili. Osy oraıda ál-Farabı atyndaǵy Qazaq ulttyq ýnıversıtetinde bul baǵdarlama óz mindetin bastap ketti.
Negizinen №14 jataqhana ornalasqan bul ǵımarattyń irgesi 1986 jyly qalanǵan. Jalpy aýmaǵy on myń sharshy metrden astamdy qamtıdy. Bes qabatty ǵımaratty alyp jatqan №14 jataqhana jıyny jeti júzden astam stýdentti turǵylyqty orynmen qamtamasyz etpek. Jalpy jataqhanany qaıtadan jańǵyrtyp, jańartýǵa - 493 mıllıon teńge qarajat jumsalǵan.
«Edil-Jaıyq» JShS ınvestıtsııalyq-qurylys merdiger kompanııasy tarapynan bul jataqhanaǵa kúrdeli jóndeý-qurylys jumystary jasalynyp, ǵımarat syrty túgel grafıttelip, ǵımaratqa jańadan tósenish tóseldi, barlyq santehnıkalyq qural-jabdyqtar, elektro-tehnıkalyq qurylǵylar jańartyldy. Bir mezgilde 64 adamǵa qyzmet kórsetetin 4 jýynatyn bólme, sport zal jasaqtalǵan. Mundaǵy bólmeler kúndelikti turmysqa qajetti tósek-oryn, ústel, oryndyq sııaqty jabdyqtarmen jáne teledıdarlarmen, kompıýter synyptarymen qamtylǵan. Sonymen qatar stýdenttiń ekinshi úıi sanalatyn bul mekende oqý zaly, 250 oryndyq ashana, mádenı-rýhanı, kópshilik sharalar uıymdastyrýǵa arnalǵan akt zaldary bar.
Jataqhana aýmaǵyndaǵy eski aǵashtardyń ornyna jańadan taldar otyrǵyzylyp, aýmaǵy abattandyryldy.
Bir sózben aıtqanda salaýatty da, salamatty ómir úshin barlyq jaǵdaı jasalynǵan.
«Ál-Farabı atyndaǵy Qazaq ulttyq ýnıversıtetinde 13 jataqhana bar, ıaǵnı ár fakýltet stýdenttik baspanamen qamtylǵan. QazUÝ óz kezeginde bes myńnan astam stýdentke jataqhanadan oryn beredi. Olardyń barlyǵy jańa oqý jylyna saqadaı saı, barlyǵyna derlik kúrdeli jóndeý jasaldy. Almaty qalasy ákimshiliginiń jáne qalalyq memlekettik sanıtarlyq-epıdemıologııalyq qadaǵalaý departamentiniń tekserýinen ótip, barlyq jataqhana stýdentti jaıǵastyrýǵa ruqsat aldy», - deıdi ál-Farabı atyndaǵy QazUÝ Óndiris departamentiniń dırektory Murat Nurǵazın.
Alda 2011-2015 jyldarǵa arnalǵan «Stýdenttik baspana» baǵdarlamasy boıynsha taǵy 9 stýdentter jataqhanasyna kúrdeli jóndeý jumystary belgilengen. Jospar boıynsha ál-Farabı atyndaǵy Qazaq ulttyq ýnıversıtetinde PH doktoranttar men shetelden shaqyrylatyn oqytýshylarǵa arnalyp taǵy 2500 oryndyq jataqhana salynbaq.
