QazUÝ Avstrııa jáne Ońtústik Koreıa JOO-larymen kelisimge qol qoıdy
ASTANA. QazAqparat - Avstrııanyń Alpbahynda úkimet basyndaǵy jáne burynǵy memleket, úkimet basshylary, halyqaralyq uıymdar men BAQ ókilderiniń qatysýymen joǵarǵy deńgeıdegi jyl saıynǵy bedeldi saıası forým bolyp ótti. Eýropalyq jáne jahandyq máselelerdiń sheshimin tabýǵa arnalǵan bul shara óz alańynda álemniń 100 memleketinen kelgen 5 myń qatysýshynyń basyn qosty, dep habarlaıdy QazAqparat.
Avstrııanyń prezıdenti Aleksandr Van der Bellen, BUU-nyń segizinshi Bas hatshysy Pan Gı Mýn, Avstrııanyń burynǵy prezıdenti Haınts Fısher, Serbııanyń premer-mınıstri Aleksandr Výchıch jáne taǵy basqalar sımpozıýmnyń basty spıkerleri bolyp tabyldy jáne olar ǵalamdyq tektonıkalyq saıası-ekonomıkalyq ózgerister konteksinde forýmnyń ózektiligin atap ótti.
Ál-Farabı atyndaǵy QazUÝ jáne jaqynda onyń janynda qurylǵan Pan Gı Mýn atyndaǵy turaqty damý ınstıtýty atalmysh sharaǵa BUU-nyń jahandyq azamattyq jáne turaqty damý baǵytyndaǵy bastamalaryn júzege asyrý boıynsha yntymaqtastyqtyń perspektıvalaryn talqylaý maqsatynda shaqyryldy.
QazUÝ «BUU-nyń «Akademııalyq yqpal» jahandyq habyn 2014 jyldan beri basqaryp keledi jáne baǵdarlamanyń mańyzdy qaǵıdalaryn iske asyrýda halyqaralyq deńgeıde tanymal kósbasshy bolyp tabylady.
Ál-Farabı atyndaǵy QazUÝ-dyń rektory, akademık Ǵalym Mutanovtyń «Ýnıversıtet 4.0 - joǵary bilim berýdegi jańa kezeń» atty baıandamasy forým qatysýshylarynyń erekshe qyzyǵýshylyǵyn týdyrdy. Atalmysh bastama buǵan deıin BUU-nyń Nıý-Iorktegi shtab-páterinde mamyr aıynda ótkizilgen konferentsııa barysynda alǵash ret usynylǵan bolatyn. Osy qyzmettegi aıqyn baǵyt-baǵdar memlekettik baǵdarlama «Bolashaqqa baǵdar: qoǵamdyq sanany jańǵyrtý» bolyp tabylady.
Jańa ýnıversıtet modeliniń mıssııasy jastardy boıynda álemdik joǵary rýhanı-adamgershilik qasıetteri men belsendi azamattyq ustanymy bar izgilikti azamat retinde qalyptastyrý. Forýmǵa qatysýshylardyń atap ótkenindeı, «Ýnıversıtet 4.0» jańa modeli jahandaný jaǵdaıynda, sondaı-aq jańa tehnologııalardyń qarqyndy damýy kezeńinde erekshe mańyzdy.
Qazaqstandyq joǵary oqý ornynyń forýmǵa qatysýynyń basty nátıjesi Ǵalamdyq azamattyq ortalyǵy (Avstrııa), Turaqty damý ınstıtýty (Ońtústik Koreıa) jáne ál-Farabı atyndaǵy QazUÝ arasynda Strategııalyq seriktestik týraly kelisimge qol qoıý bolyp tabyldy. Qujatty Avstrııanyń eks-prezıdenti Haınts Fısher, BUU-nyń segizinshi Bas hatshysy Pan Gı Mýn jáne QazUÝ rektory Ǵalym Mutanov (Qazaqstan) qoldaryn qoıyp bekitti. Kelisim-shart adamzattyń jahandyq máseleleri men qazirgi zamannyń syn-tegeýrinderin sheshýde taraptardyń kúsh-jigerin biriktirýge múmkindik beredi.
