QazUÝ áleýmettik jaýapty ýnıversıtet dep tanyldy
ASTANA. QazAqparat - Ál-Farabı atyndaǵy QazUÝ «Ýnıversıtetterdiń áleýmettik jaýapkershilik jelisi» (USRN) bedeldi uıymynyń múshesi atandy. Halyqaralyq uıym Manchester jáne Kembrıdj ýnıversıtetteri (Ulybrıtanııa), Beıjiń ýnıversıteti (QHR), Gonkong polıtehnıkalyq ýnıversıteti, Vashıngton ýnıversıteti (AQSh), San-Paýlý ýnıversıteti (Brazılııa) syndy tanymal JOO-lardy biriktiredi.
Álemde korporatsııalar men bıznes-qurylymdardyń áleýmettik jaýapkershiligin arttyrýǵa erekshe kóńil bólinedi. Áleýmettik jaýapkershilik mádenıetin qalyptastyrýda JOO-lardyń da atqarar róli zor. Ýnıversıtetter bilim berý qyzmeti jáne ǵylymı zerttemeler túrinde qoǵamdyq ıgilikterdi quryp qana qoımaı, qoǵamdaǵy áleýmettik minez-qulyq erejesiniń qaınar kózi bolyp tabylady. Zamanaýı joǵary oqý ornynyń mindeti bilikti mamandar daıarlaýmen shektelmeıdi, búginde ol qoǵam aldyndaǵy áleýmettik jaýapkershilikpen tolyǵýy tıis.
Bul paradıgma jetekshi ýnıversıtetterdi adamzattyń asa ózekti jáne qaýyrt máselelerin sheshýdegi JOO-lardyń áleýmettik rólin nyǵaıtý úshin birigip, konsortsıým qurýǵa ıtermeledi. USRN qyzmeti zamanaýı órkenıettiń bolashaǵy úshin JOO-lardyń áleýmettik jaýapkershiligin oryndaýda múshe-ýnıversıtetterdiń tıimdi ózara árekettesý tuǵyrnamasyn qurýǵa baǵyttalǵan.
San-Paýlý ýnıversıtetinde ótken USRN arnaıy konferentsııasynda aıtýly uıym músheleri qazaqstandyq jetekshi ýnıversıtetti qatarǵa qabyldaý týraly sheshimdi biraýyzdan qabyldady.
Konferentsııada QazUÝ-dyń BUU turaqty damý boıynsha «Akademııalyq yqpal» baǵdarlamasynyń Jahandyq haby retindegi tájirıbesi keńinen tanystyryldy. QazUÝ usynǵan joǵary oqý oryndary damýynyń jańa tuǵyrnamasy - 4.0 ýnıversıtet úlgisi uıym músheleriniń úlken qyzyǵýshylyǵyn týdyrdy. Bul modeldi júzege asyrýda qoǵamdyq sanany jańǵyrtýǵa arnalǵan «Rýhanı jańǵyrý» baǵdarlamasy basty baǵdar bolyp tabylady. Ol tórt quramdas bólikten turady: bilim berý, zertteý, ınnovatsııalyq-kásipkerlik jáne rýhanı-adamgershilik.
Búgingi kúni 4.0 ýnıversıtet úlgisi negizin ınnovatsııalyq-tehnologııalyq jáne rýhanı-adamgershilik tuǵyrnama úndestigi quraıtyn «Al-Farabi University smart city» jobasynda is júzinde júzege asýda.
