QazUÝ álemniń jasyl ýnıversıtetteri reıtıngine endi
ASTANA. QazAqparat - UI Green Metric jyl saıynǵy UI GreenMetric Ranking of World Universities 2017 reıtıngin - álemniń «ekologııalyq taza» ýnıversıtetteri tizimin jarııalady. Reıtıngke qazaqstandyq JOO da qatysqan.
Ál-Farabı atyndaǵy QazUÝ baspasóz qyzmetiniń habarlaýynsha, túrli JOO-lardyń turaqty damýǵa jáne joǵary oqý oryndaryn basqarýǵa qolaıly jaǵdaı jasaýǵa umtylýyn salystyratyn reıtıng segizinshi ret uıymdastyrylyp otyr. Reıtıng nátıjesi ýnıversıtetter usynǵan onlaın aqparat negizinde esepteledi.
Bıylǵy aqparattar alty negizgi deńgeı boıynsha jiktelgen: jasyl kórsetkishter (15%), energetıka jáne klımattyń ózgerýi (21%), qaldyqtardy basqarý (18%), sýdy paıdalaný (10%), kólik (18%), jáne bilim berý (18%).
2017 jyldyń nátıjeleri AQSh, Ulybrıtanııa, Japonııa, Ispanııa, Italııa, Ońtústik Amerıka, Qytaı Taıbeıi jáne Eýropa, Azııa jáne Afrıkadan bólek, Aljır, Bahreın, Fınlıandııa, Gondýras, Qazaqstan, Qyrǵyzstan, Jańa Zelandııa, Nıgerııa, Nıkaragýa, Venesýela ýnıversıtetterin qamtyǵan.
Saralaý qorytyndysy boıynsha ál-Farabı atyndaǵy QazUÝ ınfraqurylym (855), energetıka jáne klımattyń ózgerýi (1441), qaldyqtardy basqarý (774), sýdy paıdalaný (280), kólik (912) jáne bilim (827) boıynsha 5089 ball jınap, álemniń 619 ýnıversıtetiniń arasynda 186 oryndy ıelendi.
