QazUÝ 2020 jylǵa deıin BUU baǵdarlamasynyń ǵalamdyq habyna jetekshilik etedi
Birikken ulttar uıymynyń Nıý-Iorktegi shtab-páterinde Qoǵamdyq aqparat departamentiniń dırektory, BUU «Akademııalyq yqpal» baǵdarlamasynyń jetekshisi Ramý Damodaran ál-Farabı atyndaǵy QazUÝ rektory, akademık Ǵalym Mutanovqa tıisti sertıfıkatty tabys etti.
2014 jyldan beri ǵalamdyq habty basqaryp kele jatqan QazUÝ jumysyn BUU joǵary baǵalady. R. Damodaran ýnıversıtettiń ózine júktelgen mıssııany tıimdi oryndaǵanyn atap ótti. Sondaı-aq jetekshi qazaqstandyq joǵary oqý ornynyń ujymyna zor alǵys bildirip, adamzattyń jahandyq máselelerin sheshýge qosqan úlesi úshin sheksiz rızashylyǵyn jetkizdi.
«Ýnıversıtet BUU-nyń mańyzdy áriptesi jáne turaqty damý boıynsha kóptegen halyqaralyq sharalardyń bastamashysy retinde akademııalyq qaýymdastyqty olardy iske asyrýǵa belsendi túrde tartyp, álemdik deńgeıdegi jobany basqarýda ozyq úlgi kórsetýde. QazUÝ ókilettikterin 2020 jylǵa deıin uzartý týraly sheshim zańdylyq ári Qazaqstannyń úlken jetistigi bolyp tabylady. Bul - halyqaralyq qaýymdastyq múddelerine saı jáne BUU-nyń joǵary seniminiń kórsetkishi», - dedi Ramý Damodaran.
BUU-nyń «Akademııalyq yqpal» baǵdarlamasy adamzat órkenıetiniń damýyn qamtamasyz etýdiń on qaǵıdasyn júzege asyrý maqsatynda álem ýnıversıtetterin biriktiredi.
