QazUTÝ ujymy Elbasynyń ókilettigin uzartý jónindegi referendýmdy qoldady - Almaty
ALMATY. 28 jeltoqsan. QazAqparat /Erbol Turymbetov/ - Búgin Almatyda Q. Sátbaev atyndaǵy Qazaq ulttyq tehnıkalyq ýnıversıtetiniń ujymy Elbasy Nursultan Nazarbaevtyń ókilettigin 2020 jylǵy 6 jeltoqsanǵa deıin uzartý maqsatynda búkilhalyqtyq referendým ótkizý jónindegi respýblıkalyq yntaly toptyń usynysyn qyzý qoldaıtynyn bildirdi.
Tuńǵysh Prezıdentimiz - Elbasy N. Nazarbaevtyń prezıdenttik ókilettigin uzartýǵa qatysty referendým ótkizý jónindegi bastamashy toptyń QR azamattaryna Úndeýin talqylaýǵa arnalǵan basqosýda barlyq qatysýshylar pikiri bir arnaǵa toǵysty. Oǵan ýnıversıtet basshylyǵy, oqý ornyna qarasty barlyq ınstıtýttardyń dırektorlary men qurylymdardyń jetekshileri, professor-oqytýshylar ókilderi men kafedra meńgerýshileri, stýdentter qaýymynyń belsendi músheleri qatysty.
QazUTÝ-daǵy dene tárbıesi kafedrasynyń meńgerýshisi, kezinde voleıboldan Qazaqstan qurama komandasyn álemge tanytqan áıgili sportshy J.Saýranbaev óz oıymen bólisti. «Jaqynda ǵana Prezıdentimizdiń ókilettigin uzartý jónindegi bastamashy toptyń múshesi Oljas Súleımenovpen jolyǵyp, pikir alystym. Meniń oıymsha, Qazaqstan sportyna eleýli de súbeli úles qosqan, esimderi áıgili sportshylar birigip, QR Týrızm jáne sport mınıstrligi arqyly Úndeýge qoldaý bildirýdi kózdep otyrmyz. Elimizde bilim men ǵylymdy ǵana emes, sportty damytýǵa únemi kóńil bólip kele jatqan N.Ábishulyna biz de osyndaı sátte shyn qoldaý bildiremiz», - dedi ol.
Jıyndy ýnıversıtet rektory Jeksenbek Ádilov qorytyndylady. «Bul máselede, ásirese, jastar arasynda durys túsindirý jumystaryn júrgizý qajet. Elbasynyń qajyrly eńbegin qoldaý árkimniń óz erki. Dese de, búgingideı baqytty ómir men el tynyshtyǵynan asqan eshteme joq ekenin de umytpaǵan jón»,- dedi rektor.
Jıynǵa qatysýshylar búgingi Prezıdentimizdiń ókilettigin uzartýdy qoldaý jóninde biraýyzdy sheshimge keldi.
