QazUTÝ «Sátpaev kúnderi» merekesin atap ótti
ATY. 12 sáýir. QazAqparat /Áıgerim Ámir/ - Búgin Almatyda Q.I.Sátpaev atyndaǵy QazUTÝ-da Qanysh Sátpaevtyń týǵan kúnine oraı jyl saıyn ótetin dástúrli "Sátpaev kúnderi" merekesi atap ótildi.
Saltanatty merekege Qanysh Sátpaevtyń týystary, ýnıversıtet qyzmetkerleri men shákirtteri jáne ǵalymnyń zamandastary, sondaı-aq, birge jumys istegen qyzmettes dostary qatysty. Atalǵan adamdardyń qatysýymen Sátpaev eskertkishine gúl shoqtary qoıyldy.
Sondaı-aq jyl saıyn dástúrli túrde qomaqty ǵylymı jetistikteri úshin beriletin Qanysh Sátpaev atyndaǵy syılyq bıylǵy jylǵy ıegerine saltanatty túrde tapsyryldy. Ony tehnıka ǵylymdarynyń doktory, professor Myrzahmetov Meńlibaı Myrzahmetuly jeńip aldy.
Mereke aıasynda, ýnıversıtettiń oqý-tárbıe isi jónindegi prorektory, Qazaqstannyń eńbegi sińgen qaıratkeri, professor Ulyqpan Sydyqov ýnıversıtet rektorynyń kýbogi úshin ótken «Salaýatty jas - salaýatty qoǵam» atty sporttyq spartakıadasynyń jeńimpazdaryn marapattady.
Atalmysh shara sońy oqý ornynyń ónerpaz jastarynyń án-kúıimen jalǵasty.
