QazUMÝ bazasynda 783 alǵashqy medıtsınalyq sanıtarlyq kómek mekemeleriniń qyzmetkerleri oqytýdan ótetin bolady - O.Myrzabekov
ALMATY. 8 sáýir. QazAqparat /Ádilet Musahaev/ - Ótken jyly ýnıversıtet qyzmetkerleri úsh tilde qatar bilim berý baǵdarlamasyn qolǵa aldy.
Stýdentterge birinshi kýrstan bastap qazaq, orys jáne shetel tilderinde bilim berý, keıin jumys barysynda osy tilder qajet bolatyndyǵyn sezindire túsý qajet. Bul jaıynda S.Asfendııarov atyndaǵy Qazaq ulttyq medıtsına ýnıversıtetiniń oqytýshysy, medıtsına ǵylymdarynyń doktory Mıra Ábırova Almatyda «Qazaqstan Respýblıkasynda qoǵamdyq densaýlyq saqtaý isin damytýdyń máseleleri jáne keleshegi. Densaýlyq saqtaý menedjerlerin daıarlaýdaǵy quzyrly qadamdar» taqyrybynda ótken dóńgelek ústel barysynda aıtty.
Onyń aıtýynsha, atalǵan ýnıversıtet bilim sapasyn arttyrý maqsatynda halyqaralyq kongrestermen yntymaqtastyq quryp, tájirıbe almasyp jatyr. "Byltyr naýryz aıynda QR Bilim jáne ǵylym mınıstriniń nusqaýymen Bolondyq úrdiske qosylý jónindegi qaýlyǵa qol qoıyldy", - deıdi ol.
Sonymen qatar ol elimizdiń naryqtyq ekonomıka kezeńine ótýi men álemdik qaýymdastyqpen tyǵyz qarym-qatynas ornatýy densaýlyq saqtaý uıymdaryn basqarýǵa ekonomıkalyq jáne áleýmettik-psıhologııalyq ádister men menedjment jáne marketıng ustanymdaryn engizýdiń qajettiligin kórsetip otyrǵandyǵyn aıtady.
"Densaýlyq saqtaý salasyndaǵy reformalardyń tabysty júzege asýy óz kezeginde ortalyqtandyrylǵan basqarý jaǵdaıyna tán uıymdastyrýshynyń rólin menedjer, basqarýshyǵa almastyrýdy talap etip otyr. Bul baǵytta basqarýshy mamandardy daıarlaý, qaıta daıarlaý, kásibı biliktiligin kóterý basty mańyzǵa ıe", - dep atap ótti óz sózinde M. Ábırova.
Atalǵan ýnıversıtettiń ǵylymı-klınıkalyq jumysy boıynsha prorektory Oraz Myrzabekov qazirgi kezeńde QR Densaýlyq saqtaý mınıstrligi halyqaralyq mamandarmen birlese otyryp densaýlyq saqtaý salasy jetekshilerin daıarlaý jónindegi jaǵdaıǵa saraptaý júrgizip, densaýlyq saqtaý salasy menedjerleri ınstıtýtyn damytý boıynsha josparlar ázirlep jatqandyǵyn aıtady. "Medıtsınalyq uıymdardy sharýashylyq júrgizý quqyǵyndaǵy mekemelerge kezeń-kezeńimen aýystyrý josparlanýda. Bul úshin medıtsınalyq uıymdardyń jetekshilerin oqytý bastaldy jáne 1618 mamandy oqytý mejelenýde. QazUMÝ bazasynda 783 alǵashqy medıtsınalyq sanıtarlyq kómek mekemeleriniń jáne aýdandyq, qalalyq, oblystyq, respýblıkalyq deńgeıdegi aýrýhanalyq uıymdardyń basshylyq quramy oqytýdan ótetin bolady", - deıdi O.Myrzabekov.
Jıyn aýqymynda qoǵamdyq densaýlyq saqtaý salasynyń mamandaryn jáne densaýlyq saqtaý menedjerlerin daıarlaýdaǵy qordalanǵan problemalardy, olardyń róli men ornyn, bilim berý quzyreti men keleshegi talqylandy.
Sharaǵa QR Densaýlyq saqtaý mınıstrliginiń ókilderi, «Astana-medıtsınalyq ýnıversıteti» AQ, S.J. Asfendııarov atyndaǵy Qazaq ulttyq medıtsına ýnıversıteti, Semeı memlekettik medıtsına ýnıversıteti, Qaraǵandy memlekettik medıtsına ýnıversıteti, Ońtústik Qazaqstan memlekettik farmatsevtıkalyq akademııasy, Joǵarǵy qoǵamdyq densaýlyq saqtaý mektebi, Respýblıkalyq medıtsına kolledji qyzmetkerleri de qatysty.
