QazUAÝ stýdentteri Qysqy Azııa oıyndary eriktileriniń eń úlken toby dep moıyndaldy
ALMATY. 17 qańtar. QazAqparat /Ádilet Musahaev/ - 2011 jylǵy 7-Qysqy Azııa oıyndaryndaǵy eriktilerdiń eń úlken toby Almaty boıynsha Qazaq ulttyq agrarlyq ýnıversıtetiniń stýdentteri eken.
Azıadanyń jedel eriktiler qyzmeti shtabynyń tóraǵasy Bahtııar Makenniń aıtýynsha, qalanyń JOO-y 7- Qysqy Azııa oıyndaryn ótkizý jónindegi daıyndyq jumystaryna belsene aralasýda. Quramynda 600 stýdenti bar QazUAÝ-dyń eriktileri kósh bastap tur eken.
Atalǵan ýnıversıtettiń tárbıe isi jáne qoǵammen baılanys departamentiniń dırektory Baýyrjan Imanǵalıev stýdentterdiń «Tabaǵan», «Shymbulaq», «Medeý», shańǵy-bıatlony men halyqaralyq shańǵymen tuǵyrdan sekirý sport keshenderinde kórermenderdi ornalastyrýǵa kómek kórsetetindigin aıtty.
Búgingi kúni eriktiler nysandardy zerdelep úırenip júr. Odan keıin olardy tehnıka qaýipsizdigimen tanysý kútip tur. Eriktilerge tegin tamaq berý, nysandarǵa aparý men turǵylyqty jerine jetkizý máseleleri tolyqtaı qamtamasyz etilgen.
Al til biletin stýdentter sheteldik sportshylar men delegatsııalardy qabyldap, solarǵa qyzmet kórsetetin bolady.
"Biz, elimizben oqý ornymyzdyń patrıoty retinde Qysqy Azııa oıyndaryn uıymdastyrý jumystaryna qýana qatysamyz. Sheteldik qonaqtar men álemniń túkpirinen keletin jankúıerlerdi elimizdiń jerinde qarsy alý, biz úshin abyroı", -deıdi QazUAÝ-diń 4 kýrs stýdenti Dıas Sabyrbaev.
