«Qaztsınktegi» apat: Qala turǵyny Óskemen ákimin sotqa berdi
ÓSKEMEN. KAZINFORM — Óskemen qalasynyń turǵyny «Qaztsınk» kásipornynda bolǵan apattan keıin halyqqa yqtımal qaýip pen saqtyq sharalary týraly aqparat ýaqtyly jetkizilmegen dep eseptep, qala ákimine qarsy sotqa talap-aryz túsirdi.
Talap-aryzdy zańger Alekseı Bojkov bergen. Buǵan 5 mamyr kúni «Qaztsınk» JShS aýmaǵynda bolǵan apat sebep bolyp otyr. Zańgerdiń aıtýynsha, oqıǵa bolǵan alǵashqy saǵattarda turǵyndar jaǵdaıdyń qanshalyqty qaýipti ekenin jáne qalaı áreket etý kerektigin bilmegen.
— Kásiporynda jarylys boldy, biraq odan keıin memlekettik organdar tarapynan únsizdik ornady. Bolǵan jaǵdaıdy áleýmettik jelilerden bildik. Túske deıin qandaı da bir resmı aqparat alýǵa tyrystyq. Bilim bólimine, Ekologııa departamentine, ákim apparatyna, ishki saıasat bólimine habarlastyq. Barlyǵyn tolǵandyrǵan negizgi suraq — turǵyndar ne isteýi kerek? Úıde qalý qajet pe, qaladan shyǵý kerek pe, balalardy mektepke jiberýge bola ma?, — deıdi Alekseı Bojkov.
Onyń aıtýynsha, resmı túsindirme bolmaǵandyqtan, balasyn sol kúni mektepke jibermegen. Keıin Ekologııa departamenti apat saldarynan atmosferaǵa 2,8 tonna myrysh shańynyń taraǵanyn habarlady. Osyǵan baılanysty kásiporyn ekologııalyq zańnamany buzǵany úshin ákimshilik jaýapkershilikke tartyldy.
Zańgerdiń aıtýynsha, bul — osyǵan uqsas alǵashqy sot isi emes. Buǵan deıin de Óskemen aýasynda hlorsýtek kontsentratsııasynyń shekti mólsherden asýyna baılanysty sotqa júginip, mundaı jaǵdaılarda turǵyndarǵa resmı aqparat jedel berilýi tıis ekenin alǵa tartqan. Bul jolǵy talap-aryzynda Alekseı Bojkov sottan tehnogendik sıpattaǵy tótenshe jaǵdaılar kezinde halyqty aqparattandyrý boıynsha jergilikti atqarýshy organdardyń is-áreketine quqyqtyq baǵa berýdi surap otyr.
Al Óskemen qalasynyń ákimdigi áreketsizdik týraly aıyptaýlarmen kelispeıtinderin bildirdi.
— 5 mamyr kúni oqıǵa týraly aqparat túsken boıda qala ákimi Almat Aqyshov tótenshe jaǵdaı ornyna baryp, onda jedel shtab quryldy. Onyń quramyna tótenshe jaǵdaılar qyzmeti, kásiporyn mamandary jáne ýákiletti memlekettik organdardyń ókilderi kirdi. Sol kúni ákimdik resmı aqparattyq resýrstarynda turǵyndarǵa bolǵan oqıǵa týraly habarlap, múmkindiginshe úıde bolýǵa, asa qajet bolmasa syrtqa shyqpaýǵa, kerek bolǵan jaǵdaıda qorǵanys maskalaryn qoldanýǵa jáne aqparatty tek resmı derekkózderden alýǵa shaqyrdy. Bul habarlama tótenshe jaǵdaılar kezindegi bekitilgen ózara is-qımyl algorıtmine sáıkes jarııalandy, — dep habarlady qala ákimdiginiń baspasóz qyzmetinen.
Qazirgi ýaqytta talap-aryz boıynsha sot protsesi jalǵasyp jatyr.
Eske salsaq, osyǵan «Kaztsınk» kásipornyndaǵy jarylystan 9 adam zardap shegip, olardyń úsheýi aýyr jaǵdaıda ekenin jazǵan edik.
Keıinne kásipornyndaǵy jarylystan eki adam qaza bolǵany aıtyldy.
