«Qaztsınkti» Shahmurat Mútáliptiń satyp alatyny ras pa — mınıstr jaýaby

ASTANA. KAZINFORM — Ónerkásip jáne qurylys mınıstri Ersaıyn Naǵaspaev «Qaztsınk» jáne «Qazaqmys» kompanııalarynyń ıesi aýysatyny týraly málimetterge pikir bildirdi. 

— Shveıtsarııanyń Glencore Plc kompanııasyna tıesili «Qaztsınk» aktsııalarynyń 70 paıyzyn qazaqstandyq qurylys magnaty Shahmurat Mútálip satyp alǵysy keledi degen aqparat tarady. Sondaı-aq, Qazaq Stroy kompanııasynyń ıesi Nurlan Artyqbaev ta «Qazaqmysty» satyp alý úshin kelissóz júrgizip jatqany aıtyldy. Osydan habaryńyz bar ma, vedomstvoǵa ótinish tústi me, — dep surady jýrnalıst.

Mınıstr resmı ótinish túspegendikten naqty aqparat bere almaıtynyn aıtty.

— Men ol aqparatty telegramm-arnalardyń birinen kórdim. Bizde reglament bar. Sol reglament boıynsha kompanııa aktsııalaryn aýystyrý úshin mınıstrliktiń arnaıy ruqsaty qajet. Bizde vedomstvoaralyq komıssııa jumys isteıdi. 1 jeltoqsandaǵy jaǵdaı boıynsha bizge ashqandaı ótinish túsken joq. «Qaztsınk» týraly da, «Qazaqmys» týraly da eshqandaı ótinish túsken joq. Biraq ótinish tússe ózderińizge qosymsha aqparat beremiz. Ázirge ondaı aqparat joq, — dedi Ersaıyn Naǵaspaev.

Buǵan deıin ShQO ákimi Nurymbet Saqtaǵanov óńirdiń ekonomıkasy «Qaztsınkke» 70 paıyz deńgeıinde táýeldi kúıge túskenin aıtqan bolatyn.