«Kaztsınk» ShQO-daǵy ken oryndarynan óńirdiń damýyna jyl saıyn 9 mln teńge tólep otyr

ASTANA. KAZINFORM – Shyǵys Qazaqstan oblysynda qorǵasyn, myrysh kenishterin ıgerip otyrǵan «Kaztsınk» kompanııasy óńirdiń damýyna jyl saıyn 9 mln teńge bólip otyr. Bul týraly Premer-Mınıstr Oljas Bektenovtiń depýtattyq saýalǵa joldaǵan jaýabynda aıtylǵan.

- «Kaztsınk» kompanııasynyń ShQO-daǵy ken oryndaryn ıgerý merzimin uzartý jónindegi mindettemelerine kelsek, zańnamada óńirlik áleýmettik-ekonomıkalyq, ınfraqurylymdyq damýyna shyǵyn jumsaý mindettemeleri qarastyrylǵan. Bul mindettemeni jergilikti atqarýshy organ kompanııanyń tıisti óńirde jer qoınaýyn ıgerýge berilgen quqyǵynyń kúshinde bolatyn merzimine saı belgileıdi. «Kaztsınk» kompanııasy jer qoınaýyn paıdalaný týraly 3 kelisimshart boıynsha jylyna 9 mln teńge kóleminde áleýmettik-ekonomıkalyq damý shyǵyndaryn óteýge mindettelgen. Kelisimshart merzimi taıaǵan jaǵdaıda jer qoınaýyn paıdalanýshy ony uzartý ótinishimen ókiletti organǵa júginedi. Ol ótinimder qoldanystaǵy zańnama boıynsha qarastyrylady, - dep jazylǵan jaýapta.

Atalǵan saýalda depýtattar qorǵasyn men myryshqa degen suranystyń qubylýyna baılanysty paıdaly qazbany ıgerý salyǵynyń mólsherlemesin azaıtý týraly másele kóterilgen bolatyn.

- Paıdaly qazbany alýǵa salynatyn salyq mólsherlemesin azaıtý, sonyń ishinde qorǵasyn men myryshqa 6,5% mólsherleme belgileý týarly aıtsaq, bul salyqtyń túrin esepteýde tıisti salyq tóleý merzimindegi paıdaly qazbanyń bırjadaǵy ortasha quny negizge alynady. Qoldanystaǵy zańnamada paıdaly qazbany alý salyǵynyń mólsherlemesi qorǵasynǵa 10,4%, myryshqa 10,5% bolyp belgilengen. Salyq kodeksiniń 746-babynyń 2-tarmaǵy boıynsha ken ornynyń rentabeldiligi 5% jáne odan da az bolsa, jer qoınaýyn ıgerýshi 2021 jyldyń 31 jeltoqsanyna deıingi salyq mólsherlemesin qoldanýǵa haqyly, - dep jazady Oljas Bektenov.

ShQO-nyń Serebrıansk qalasyndaǵy respırator zaýyty qaıta túleıtini aıtylǵan.