«Kaztsınk» kásipornyndaǵy jarylystyń sebebi anyqtalyp jatyr
ÓSKEMEN. KAZINFORM — Óskemen qalasyndaǵy «Kaztsınk» kásipornyndaǵy jarylystyń naqty sebebi áli anyqtalǵan joq.
Búgin tańerteń Óskemendegi iri óndiris oshaqtarynyń biri — «Kaztsınk» kásipornynda jarylys boldy. Sonyń saldarynan kásiporyn aýmaǵy mańynda qoıý, bult tárizdes tútin paıda bolyp, áleýmettik jelide foto, vıdeolar taraı bastady.
ShQO Tótenshe jaǵdaılar departamenti baspasóz qyzmetiniń málimetinshe, jarylys shań súzý tsehyndaǵy qurylǵyda bolǵan. Aldyn ala derekterge sáıkes, gaz ben aýa qospasynyń tutanýy órtke ulasqan. Sonyń saldarynan óndiristik ǵımarattyń bir bóligi opyrylyp túsken. Qutqarý qyzmetteri oqıǵa ornyna jedel jetip, órtti aýyzdyqtaý jáne saldardy joıý jumystaryn júrgizdi.
Oqıǵadan keıin ekologııalyq ahýal da jiti baqylaýǵa alyndy. Ekologııa departamentiniń mamandary kásiporyn aýmaǵyna baryp, atmosferalyq aýaǵa taraǵan zııandy shyǵaryndylardy anyqtaý boıynsha tekserý jumystaryn qolǵa aldy. Qazirgi ýaqytta aýa sapasyna qatysty naqty kórsetkishter zerttelip jatyr.
Jarylys saldarynan áýeli 4 adamnyń zardap shekkeni jaıly málimet taraǵan bolatyn.
Keıin toǵyz adamnyń medıtsınalyq kómekke júgingeni jaıly aqparat tarady.
Oblystyq Densaýlyq saqtaý basqarmasynyń málimetine sáıkes, eki zardap shegýshi aýyr jaǵdaıda aýrýhanaǵa jetkizildi. Taǵy bir adamǵa oqıǵa ornynda jedel reanımatsııalyq kómek kórsetilgen. Bir qyzmetkerdi áriptesteri óz kúshterimen medıtsınalyq mekemege jetkizgen. Qalǵan zardap shekkenderdiń jaǵdaıy naqtylanyp jatyr.
Atalǵan oqıǵa Úkimet deńgeıinde de nazardan tys qalǵan joq. Premer-mınıstr Oljas Bektenov jaǵdaıdy jeke baqylaýyna aldy. Ol jaýapty mınıstrlikter men óńir ákimdigine barlyq qajetti sharalardy qabyldap, ahýal týraly turaqty túrde baıandap otyrýdy tapsyrdy.
Qazirgi ýaqytta oqıǵanyń naqty sebepteri anyqtalyp jatyr. Tergeý nátıjeleri men ekologııalyq saraptama qorytyndylary aldaǵy ýaqytta jarııalanýy tıis.
