«Qaztsınk» kásipornyndaǵy jarylystan zardap shekkenderge respýblıkalyq deńgeıdegi jetekshi mamandar keldi
ÓSKEMEN. KAZINFORM – Óskemen qalasynda «Qaztsınk» JShS-daǵy apattan zardap shekkenderge kómek kórsetý úshin Astanadaǵy Ulttyq shuǵyl medıtsınany úılestirý ortalyǵynyń jetekshi mamandary keldi.
Dárigerler mingen ushaq keshe túnde qalaǵa kelip qondy. Olar áýejaıdan birden zardap shekkender jatqan oblystyq mamandandyrylǵan medıtsınalyq ortalyqqa jetkizildi.
Óńirge respýblıkanyń bas reanımatology Baqyt Jarqymbekov jáne bas kombýstıolog Jomart Jalǵaspaev keldi.
Naýqastardy qarap shyqqannan keıin dárigerler shuǵyl konsılıým ótkizip, emdeýdiń aldaǵy baǵytyn aıqyndady. Denesiniń basym bóligin kúıik shalǵan patsıent óte aýyr jaǵdaıda jatyr.
- Oǵan keshendi qarqyndy terapııa júrgizilip jatyr. Qazirgi negizgi mindet - aldaǵy 72 saǵat ishinde naýqasty kúıiktik shoktan shyǵarý, - dep habarlady ShQO Densaýlyq saqtaý basqarmasynan.
Dárigerler naýqastyń jaǵdaıy turaqtalǵannan keıin ǵana ony Astanaǵa tasymaldaý máselesin qarastyra alady.
Al omyrtqa jaraqaty bar taǵy bir naýqas sanıtarlyq avıatsııa arqyly Ulttyq shuǵyl medıtsınany úılestirý ortalyǵynyń neırohırýrgııa bólimine jiberýge daıyndalyp jatyr. Aldyn ala derek boıynsha ushý 7 mamyrǵa belgilengen.
Eske salsaq, keshe tańerteń Óskemendegi kásiporynda jarylys boldy.
Sonyń saldarynan eki adam qaza bolyp, beseýi zardap shekti.
Premer-mınıstr Oljas Bektenov Óskemendegi jarylysty jeke baqylaýyna aldy.
Jarylysqa qatysty polıtsııa qylmystyq is qozǵady.
