«Qaztsınk» kásipornyndaǵy jarylystan soń Óskemen mektepteri onlaınǵa kóshe me
ÓSKEMEN. KAZINFORM — Óskemen qalasynda «Qaztsınk» JShS-da bolǵan jarylystan soń aýa sapasyna tekserý júrgizildi.
Búgin tańerteń Óskemendegi iri óndiris oshaqtarynyń biri — «Kaztsınk» kásipornynda jarylys boldy. Áleýmettik jelide kásiporyn aýmaǵy mańynda qoıý, bult tárizdes tútintiń foto, vıdeosy taraǵan soń turǵyndar arasynda oqýshylardy onlaın formatqa aýystyrý jaıly bastama kóterip jatqandar boldy.
Soǵan baılanysty ShQO Bilim basqarmasynan jaýap berdi.
— Aýa sapasyna júrgizilgen tekserý barysynda belgilengen shekti ruqsat etilgen kontsentratsııa normalarynyń asýy tirkelgen joq. Sondyqtan mektep oqýshylary úshin sabaqtar shtattyq rejımde ótkiziledi, — dep habarlady basqarmanyń baspasóz qyzmetinen.
Eske salsaq, osyǵan deıin «Kaztsınk» kásipornyndaǵy jarylystyń sebebi anyqtalyp jatqany habarlanǵan.
Qaıǵyly oqıǵa saldarynan eki adam kóz jumyp, bes adam jaraqat alǵany belgili boldy.
