«Qaztsınk» kásipornyndaǵy jarylystan qaza bolǵandardyń otbasylaryna materıaldyq kómek kórsetiledi
ÓSKEMEN. KAZINFORM – Óskemen qalasynda «Qaztsınk» kásipornyndaǵy jarylystyń sebebin anyqtaý úshin vedomstvoaralyq komıssııa qurylady.
«Qaztsınk» kásiporynda bolǵan jarylysqa baılanysty QR Premer-mınıstri Oljas Bektenovtiń tapsyrmasymen jedel shtab otyrysy ótti. Oǵan Shyǵys Qazaqstan oblysynyń ákimi Nurymbet Saqtaǵanov tóraǵalyq etti.
Aımaq basshysy óz sózinde úıindi astynda qalǵan zardap shekkenderdi izdeý jumystaryn jalǵastyryp, apat tolyq joıylǵanǵa deıin TJD qyzmetkerleriniń sol jerde bolýy qajettigin jetkizdi. Al jarylystyń naqty sebebin anyqtaý úshin vedomstvoaralyq komıssııa qurylady.
- Memlekettik eńbek ınspektsııasy komıtetiniń Shyǵys Qazaqstan oblysy boıynsha departamenti jazataıym oqıǵany tergeý úshin arnaıy komıssııa qurýy tıis. ShQO Ekologııa departamenti apatty joıý shtaby jumys istegen kezeńde atmosferalyq aýa sapasyna úzdiksiz ekologııalyq monıtorıng júrgizýi qajet. Qaza bolǵandar men zardap shekkenderdiń otbasylaryna psıhologııalyq jáne materıaldyq kómek kórsetiledi, - dedi Nurymbet Saqtaǵanov.
Óndiristik tsıkldiń odan ári jumys isteý múmkindigin baǵalaý boıynsha tıisti sharalar qabyldanbaq. Sondaı-aq kásiporyndaǵy qaýipsizdik tehnıkasynyń saqtalýyna baqylaý kúsheıtiledi.
Eske salsaq, osyǵan deıin «Qaztsınk» kásipornyndaǵy jarylystan eki adam qaza bolyp, beseýi zardap shekkeni habarlanǵan.
