«Qaztsınk» kásipornyndaǵy jarylystan eki adam qaza bolyp, beseýi zardap shekti
ÓSKEMEN. KAZINFORM — Óskemen qalasynda «Qaztsınk» JShS-da bolǵan jarylys saldarynan eki adam kóz jumyp, bes adam jaraqat aldy.
Kompanııanyń baspasóz qyzmetiniń málimetinshe, oqıǵa búgin tańerteń óndiristik jumys barysynda bolǵan.
— Tútinsorǵyshty tazalaý barysynda jarylys bolyp, artynsha órt shyǵyp, konstrýktsııalardyń bir bóligi opyryldy. Oqıǵa saldarynan eki jumysshy qaza bolyp, bes adam zardap shekti. Olarǵa qajetti medıtsınalyq kómek kórsetilip jatyr, — delingen habarlamada.
Qazirgi ýaqytta sol jerde jedel qyzmetter óz jumystaryn jalǵastyryp, apat saldaryn joıý sharalaryn júrgizip jatyr. Oqıǵanyń sebepteri men mán-jaıyn anyqtaý úshin arnaıy komıssııa qurylǵan.
«Qaztsınk» kompanııasy marqumdardyń týystary men jaqyndaryna kóńil aıtyp, zardap shekkenderge qoldaý kórsetýge daıyn ekendigin málimdedi.
— Qaza bolǵandardyń otbasylaryna jáne zardap shekkenderge qajetti kómek kórsetiledi, onyń ishinde materıaldyq jáne psıhologııalyq qoldaý da bolady, — delingen aqparatta.
Sonymen qatar qorshaǵan ortaǵa yqtımal áserge de baǵalaý júrgiziledi.
— Aldyn ala málimetter boıynsha, shańnyń taralýy tirkelgen, biraq ruqsat etilgen normadan asý jáne qaýipti lastaýshy zattardyń bólinýi anyqtalǵan joq, — delingen málimette.
Eske salsaq, osyǵan deıin «Kaztsınk» kásipornyndaǵy jarylystyń sebebi anyqtalyp jatqany habarlanǵan.
