«Kaztsınk» kásipornyndaǵy jarylystan 9 adam zardap shekti, olardyń úsheýi aýyr jaǵdaıda
ÓSKEMEN. KAZINFORM — Óskemen qalasyndaǵy «Kaztsınk» JShS aýmaǵynda bolǵan jarylystan keıin toǵyz adam medıtsınalyq kómekke júgindi.
Aldyn ala málimetter boıynsha, zardap shekken eki adam aýyr jaǵdaıda aýrýhanaǵa jetkizilgen.
— Taǵy bir adamǵa oqıǵa ornynda reanımatsııalyq kómek kórsetilip jatyr. Bir zardap shegýshini kásiporyn qyzmetkerleri óz kúshterimen medıtsınalyq mekemege jetkizdi, — dep habarlady tótenshe qyzmet ókilderi.
Sol jerde jedel járdemniń bes brıgadasy jumys istep jatyr. Qalǵan zardap shegýshilerdiń jaǵdaıy naqtylanady.
Buǵan deıin kásiporynda bolǵan jarylystan keıin órt shyqqany, onyń oqshaýlanǵany habarlanǵan edi.
Sonymen qatar zaýyttaǵy jarylystan soń aýa sapasy tekserilip jatqany aıtyldy.
