«Qaztsınk» kásipornyndaǵy jarylysqa baılanysty jedel jeli iske qosyldy
ÓSKEMEN. KAZINFORM — Óskemen qalasynda «Qaztsınk» kásipornyndaǵy jarylysqa baılanysty jedel jeli jumys istep tur.
ShQO Tótenshe jaǵdaılar departamentiniń málimetine súıensek, oqıǵa ornynda apat saldaryn joıý jumystary júrgizilip jatyr.
— Jalpy sany 80 adam men 18 tehnıka tartylǵan. Onyń ishinde komandalyq-shtabtyq kólik pen TJM ushqyshsyz ushý apparaty bar. Qazirgi ýaqytta úıindilerdi arshý jumystary júrgizilip jatyr, — dep habarlady departamenttiń baspasóz qyzmetinen.
Jarylysqa baılanysty jedel jeli de iske qosylǵan. Oǵan 8 (7232) 55-38-19 telefon nómiri arqyly habarlasýǵa bolady.
Eske salsaq, osyǵan deıin «Kaztsınk» kásipornyndaǵy jarylystyń sebebi anyqtalyp jatqany habarlanǵan.
Jarylys saldarynan eki adam kóz jumyp, bes adam jaraqat alǵany belgili boldy.
Sondaı-aq jarylys kezinde tseh opyrylyp, qaýipti aımaqta 32 adam bolǵany habarlandy.
