Qaztsınk kásipornynda qandaı qondyrǵy jaryldy, ol aýa sapasyna áser ete me
ÓSKEMEN. KAZINFORM - Óskemen qalasyndaǵy «Qaztsınk» kompanııasynyń ókilderi apat kezinde zaqymdanǵan qondyrǵyǵa qatysty mán-jaıdy túsindirip berdi.
Qala turǵyndarynyń arasynda kásiporyndaǵy aýa tazartý qurylǵylarynyń biri jarylǵan bolýy múmkin degen sybys tarady. Alaıda kompanııa ókilderi bul basqa tehnologııalyq qondyrǵy ekenin túsindirdi.
- Kópshilik oılaǵandaı, bul shań ustaǵysh qondyrǵy emes. Ol jabdyq metal óndirý kezinde reagent retinde qoldanylatyn tehnologııalyq shań shyǵarýǵa arnalǵan, - dedi «Qaztsınk» JShS basqarýshy dırektory Andreı Lazarev.
Onyń aıtýynsha, zaqymdanǵan qondyrǵy óndiristegi shyǵaryndylardy tazartý protsesinde qoldanylmaǵan. Sondyqtan onyń toqtaýy kásiporynnyń ekologııalyq júıeleriniń jumysyna áser etpeıdi.
- Barlyq ekologııalyq júıeler shtattyq rejımde jumys istep tur. Aýa sapasyna monıtorıngti kásiporynnyń óz zerthanasy da, memlekettik qyzmetter de turaqty túrde júrgizýde, - dedi ol.
Qazirgi ýaqytta óndiris jalǵasyp jatyr. Alaıda qýattylyq ýaqytsha tómendetilgen.
Eske salsaq, osyǵan deıin Qaztsınktegi jarylystan zardap shekken jumysshylardyń biri aýrýhanada kóz jumǵany habarlanǵan.
