«QazTransOıl» tutynýshylarǵa 1 mlrd teńge qaıtarýǵa májbúr boldy

NUR-SULTAN. QazAqparat - QR Ulttyq ekonomıka mınıstrliginiń Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıteti «QazTransOıl» AQ-nyń tabıǵı monopolııalar týraly zańnamany saqtaýyna tekserý júrgizdi, dep habarlaıdy QazAqparat tilshisi.

Atalǵan komıtet málimetinshe, tekserý nátıjesinde «QazTransOıl» AQ-nyń áreketterinde tabıǵı monopolııalar týraly zańnamany, atap aıtqanda «Tabıǵı monopolııalar týraly» QR Zańynyń 7-babynyń 7-2) jáne 18) tarmaqshalarynda belgilengen normalardy buzý faktileri belgili boldy. «QazTransOıl» AQ-nyń jalpy somasy 1 041 133 640 teńgeni quraıtyn 2014, 2016, 2017 jyldarǵa arnalǵan tarıftik smetany jáne 2014 jylǵa arnalǵan ınvestıtsııalyq baǵdarlamany oryndaý boıynsha mindetterin atqarmaǵany anyqtalǵan.

«Osyǵan baılanysty komıtet 1 041 133 640 teńge somasyna sýdy magıstraldyq qubyr joldary boıynsha berý jónindegi qyzmet boıynsha negizsiz alynǵan kiristi tutynýshylarǵa qaıtarý týraly buıryq shyǵardy. Sonymen birge, Tabıǵı monopolııalar sýbektileriniń memlekettik tirkeliminiń respýblıkalyq bóliminen sýdy magıstraldyq qubyr joldary arqyly berý jónindegi qyzmeti jónindegi tizilimnen «QazTransOıl» AQ-nyń shyǵarylýyna baılanysty atalǵan kompanııa negizsiz kiristi tutynýshylarǵa tikeleı qaıtardy», - dep atap ótedi komıtetten.

Sondaı-aq, tabıǵı monopolııalar týraly zańnamanyń joǵaryda atalǵan normalaryn buzǵany úshin «QazTransOıl» AQ «Ákimshilik quqyq buzýshylyq týraly» Qazaqstan Respýblıkasy Kodeksiniń 164-babynda kózdelgen jalpy somasy 293 mıllıon teńgege ákimshilik jaýapkershilikke tartyldy. Aıyppul tolyqtaı tólendi.