«QazTransOıl» munaı aıdaıtyn eki stantsııany iske qosty
ASTANA. 18 jeltoqsan. QazAqparat - Qazaqstan-Qytaı munaı qubyrynyń Atasý-Alashańqaı ýchaskesinde munaı aıdaıtyn eki stantsııa paıalanýǵa berildi. Bul týraly Halyqtyq IPO baǵdarlamasynyń resmı saıty habarlady.
«QazTransOıl» AQ (QTO) baspasóz qyzmetiniń málimetinshe, «osy óndiristik obektilerde jumystyń bastalýy «Atasý - Alashańqaı» munaı qubyrynyń ótkizý qabiletin jylyna 20 mln. tonnaǵa deıin jetkizýge múmkindik beredi».
Munaı aıdaý stantsııaarynyń qurylysyn «Qazaqstan-Qytaı munaı qubyry» JShS qarjylandyrdy. Bul kásiporynǵa QTO men Qytaıdyń CNODC kompanııasy teń ıelik etedi. Qosymsha qun salyǵyn eseptemegende, joba boıynsha shyǵyn - 20,9 mlrd. teńge.
2012 jyly Atasý-Alashańqaı arqyly 10,4 mln tonna, al aǵymdaǵy jyldyń qańtar-qarasha aılarynda 10,9 mln. tonna Qazaqstan munaıy tasymaldandy.
