«QazTransOıl» kompanııasy dıvıdendter tóleýge shamamen 42 mlrd. teńge jiberýdi josparlaýda
ASTANA. QazAqparat - «QazTransOıl» AQ dıvıdendter tóleýge 41 mlrd. 925 mln. teńge jiberýdi josparlaýda. Bul týraly búgin Kompanııa aktsıonerleriniń jyldyq jalpy jınalysynda qabyldanǵan basty sheshimderge qatysty ótken baspasóz máslıhatynda «QazTransOıl» Bas dırektory Qaıyrgeldi Qabyldın málim etti.
Onyń sózine qaraǵanda, byltyr kompanııa jalpy 63,5 mlrd. teńge taza tabys tarqan.
«2013 jyldyń qorytyndysy boıynsha «QazTransOıl» AQ bir qarapaıym aktsııasyna shaqqandaǵy dıvıdend mólsheri 109 teńgeni qurady. 2013 jylǵa dıvıdendterdiń jalpy somasy 41 mıllıard 925 mıllıonǵa jýyq teńge nemese 2013 jylda tapqan taza paıdanyń 66 paıyzyna shaq keledi», - dedi ol.
Aıta keteıik, eki jyl buryn kompanııa aktsııalary Halyqtyq IPO-ǵa shyǵarylǵan bolatyn.
«QazTransOıl» AQ qarapaıym aktsııalary Qazaqstandyq Qor Bırjasynda lıstıngten ótti. Halyqtyq IPO nátıjesinde 2012 jyldyń qarasha-jeltoqsanynda «QazTransOıl» AQ aktsıonerleri Qazaqstan Respýblıkamyzdyń 33 989 azamaty jáne 10 jınaqtaýshy zeınetaqy qorlary boldy.
2012 jyldyń nátıjeleri boıynsha «QazTransOıl» AQ bir aktsııaǵa shaqqanda dıvıdend kólemi 75 teńge jáne/nemese ornalastyrý baǵasyna 10,3 paıyz qurady. 2012 jylda dıvıdendterdiń jalpy somasy 28 847 669 925 teńge nemese 2012 jylda alǵan taza kiristiń 86 paıyzyn qurady.
«QazTransOıl» AQ - Qazaqstan Respýblıkasynyń magıstraldi munaı qubyrynyń ulttyq operatory.
«QazTransOıl» AQ jalpy uzaqtyǵy 7,6 myń km asatyn magıstraldi munaı qubyrlar men sý taratqyshtar ártaraptandyrylǵan torabyn ıelenetin Qazaqstan Respýblıkasynyń asa iri munaı tasymaldaý kompanııasy bolyp tabylady. «QazTransOıl» AQ elimizdegi óndiriletin munaıdyń jalpy kóleminiń 59 paıyzyn eksport pen ishki naryqqa tasymaldap otyr.
