«QazTransOıl» ınvestıtsııalyq tartymdylyq úshin bar múmkindikti jumsaıdy - Q. Qabyldın
ASTANA. 31 mamyr. QazAqparat - «QazTransOıl» AQ kompanııanyń ınvestıtsııalyq tartymdylyǵy úshin bar múmkindikti paıdalanady.
Búgin Astanada «Halyqtyq ІRO» baǵdarlamasynyń perspektıvasy men kompanııanyń aktsııalaryn ekinshi naryqqa aınaldyrý máseleleri boıynsha ótken dóńgelek ústel barysynda «QazTransOıl» AQ Bas dırektory Qaıyrgeldi Qabyldın osylaı málim etti.
Bas dırektordyń aıtýynsha, «QazTransOıl» kompanııasy «Halyqtyq ІRO» baǵdarlamasynyń alǵashqy jolashary bola otyryp ázirlikten aktsııalardy naryqqa ornalastyrýǵa deıingi kezeńdegi kúrdeli joldan ótti. Sol arqyly baǵdarlamanyń kelesi qatysýshylaryna standarttar qalyptastyryp ta otyr. «Biz aldaǵy ýaqytta da kompanııanyń óndiristik qyzmetiniń joǵary deńgeıin qoldaýǵa nıettimiz. Jalpy, kompanııanyń ınvestıtsııalyq tartymdylyǵyn arttyrý úshin qoldan kelgenniń bárin atqaratyn bolamyz», - deıdi Q. Qabyldın.
Al Bas dırektor orynbasary Bolat Zákirovtyń aıtýynsha, barlyq ornalastyrylǵan aktsııalardy bekitilgen qurylymǵa sáıkes bólý qorytyndysy boıynsha kompanııa aktsııalarynyń 90 paıyzyna «QazMunaıGaz» AQ ıelik etse, 8 paıyzdy Qazaqstannyń 33 myń 989 azamaty menshigine alǵan. Al elimizdegi 10 zeınetaqy qory 2 paıyzdan astam aktsııany jáne 0,05 paıyzdyq market-meıkerlerdi ıelengen.
