«QazTransOıl» Atyraý oblysyndaǵy 50 ga jerdi zańsyz paıdalanǵan
ATYRAÝ. QazAQparat - «QazTransOıl» AQ Atyraý oblysynda 10 jyl boıy 50 ga jerdi zańsyz paıdalanǵan, dep habarlaıdy «QazAqparat» HAA tilshisi.
«Jer týraly» zańnyń buzylýy bizdiń basqarma mamandary men kólik prokýratýrasynyń birlesken jospardan tys tekserýi barysynda anyqtaldy. Tekserý nátıjesinde «QazTransOıl» kompanııasynyń 10 jyl boıyna memleket jerin jáne jerasty qubyry jelilerin óz paıdasyna zańsyz paıdalanǵandyǵy anyqtaldy. Zańsyz paıdalanylǵan jer telimderi oblystyń Qurmanǵazy jáne Jylyoı aýdandarynda ornalasqan»,- dedi Atyraý oblysy jerdi paıdalaný jáne qorǵaýdy baqylaý basqarmasynyń bastyǵy Ǵıbrat Súleımenov Óńirlik kommýnıkatsııalar qyzmetinde ótken brıfıngte.
«QazTransOıl» isine qatysty ákimshilik is júrgizilip, 4 mln 764 myń teńge aıyppul salyndy. Kompanııa bir aı kóleminde zań buzýshylyqty joıýǵa mindetti.
