«QazTransOıl» AQ ótken jyly munaı tasymaldaý kólemin 3 paıyzǵa arttyrdy
ASTANA. 20 qańtar. QazAqparat - «QazTransOıl» AQ munaı tasymaldaý kólemin 3 paıyzǵa arttyrdy. Bul týraly atalmysh kompanııanyń 2010 jylǵy 11 aıdyń óndiristik qyzmetiniń qorytyndylaryna arnalǵan aqparatynda aıtylǵan.
«QazTransOıl» AQ-nyń magıstraldy munaı qubyrlary júıesimen 2010 jylǵy qańtar - jeltoqsanda munaı tasymaldaý kólemi is júzindegi derekter boıynsha 52 mln. 505 myń tonna boldy. 2009 jyldyń osy kezeńimen salystyrǵanda munaı tasymaldaý kólemi 1 mln. 621 myń tonna nemese 3 paıyzǵa artty», - delingen baspasóz habarlamasynda.
«QazTransOıl» AQ MM júıesi boıynsha júk aınalymy 2010 jylǵy on eki aıda 34 mlrd. 223 mln. tonna km. boldy. Byltyrǵy jylǵy osy kezeńimen salystyrǵanda bul kórsetkish 710 mln. tonna km-ge nemese 2 paıyzǵa artty.
Baspasóz qyzmetiniń aqparatyna sáıkes, «Atasý - Alashańqaı» munaı qubyryna munaıdy aýystyryp quıý kólemi bıylǵy esepti kezeńniń qorytyndylary boıynsha 10 mln. 092 myń tonna munaı deńgeıine jetken. Bul 2009 jyldyń osy kezeńiniń kórsetkishinen 2 mln. 394 myń tonna nemese 31 paıyzǵa artyq.
Sondaı-aq Qazaqstan Respýblıkasy aýmaǵynda ornalasqan «TON-2» munaı qubyry ýchaskesimen Reseı munaıynyń tranzıti 2010 jylǵy esepti kezeńniń qorytyndylary boıynsha 5 mln. 625 myń tonnany qurady. Bul da 2009 jyldyń qańtar-jeltoqsanymen salystyrǵanda 267 myń tonnaǵa nemese 5 paıyzǵa kóp.
Ótken jylmen salystyrǵanda «QazTransOıl» AQ magıstraldy munaı qubyrlary júıesimen Qazaqstan Respýblıkasynyń munaı óńdeýshi zaýyttaryna munaı tasymaldaý kólemi de arta túsken. Atap aıtqanda, 2010 jyldyń 12 aıynyń qorytyndylary boıynsha Qazaqstan Respýblıkasynyń MÓZ-derine óńdeý úshin munaı tasymaldaý kólemi 12 mln. 702 myń tonnany quraǵan. Bul 2009 jyldyń sáıkes kezeńiniń kórsetkishinen 1 mln. 565 myń tonnaǵa nemese 14 paıyzǵa artyq.
